Инсанди вичин уьмуьрда михьи гел тун хъсан крарикай сад я. Сулейман-Стальский райондин Герейханован 1-хуьре яшамиш жезвай агъсакъал Абдукеримов Хидир Мисриевич гьа ихьтин гел тунвайбурукай сад я лугьуз жеда. Ам 1929-йисан мартдиз Мегьарамдхуьруьн райондин Магьмутахуьре дидедиз хьана. Адан дах Мисри хуьруьн колхозда лежбер тир. 6 кьил хизандин сагьиб аялар гъвечIизмаз рагьметдиз фена. КIвалин кIвалахар Хидирални Жабраилал аватна. Хидира дидедиз колхоздин кIвалахра куьмекар гуз хьана. КIвалахдилай хтайла, суфрадик тухдалди недай фуни квачиз, аял гишила ахварал фидай.
Гьикьван дарвал авайтIани, Хидира кIелунихъ ялиз хьана. Сифте Магьмутахуьрел 4-класс кутягьна, Вини Ярагъдал 1942-йисуз 5-6-классра кIелна. 7-класс кIелдай мумкинвал тахьай жаван 1944-йисуз колхоздин хиперив фена. Мекьилани гишила авай адавай яргъалди кIвалахиз хьанач, лежбервилел элячIна. Гьеле 20 йисни тамам тахьанвай ада, Магьмутахуьрелай Самурдиз физ, там атIуз хкведай. КIвачи-кIвачи рекье авай ам, галатна, ахварал фидай вахтарни жедай.
1949-йисуз Хидир Советрин Армиядин жергейриз фена, Украинада, Белоруссияда, Эстонияда, Латвияда, Литвада къуллугъна. Эстонияда къуллугъдайла гатун вахтунда адаз токдин симера гьатна рекьизвай инсан акуна. Мукьув фейитIа, ам аскер тир. Тади гьалда са кьурай вагьрам жагъурна, токдин симер къакъудна, кас кьиникьикай къутармишна ва частуниз хабарна. Атай куьмекди аскер санчастуниз агакьарна.
Командирди адаз чухсагъул лагьана ва отпуск гана.
Армиядай хтайла, Хидир, вири хуьруьнвияр хьиз, Герейханован совхоздиз фена, ина кIвал-югъ кутуна. Ам къелемар гьасилдай питомникда рабочийвиле акъвазна. Са шумуд йисуз ана кIвалахайдалай гуьгъуьнуьз чубанвални авуна. Ада вич халис зегьметкеш тирди къалурна, хуьруьнвийрин арада гьуьрмет къазанмишна.
КIвалахдин вахтунда Хидираз совхоздин директор хьайи рагьметлу М.Бачханова са шумудра гьуьрметдин грамотаяр, пулдин пишкешар ганай. Ам “Коммунистический зегьметдин зарбачи” значокдиз лайихлу хьана.
Вичин са кьадар яшар ятIани, Хидир буба хуьре жезвай хийир-шийирдикай садрани къерех хьана акъваззавач. Хъсан хизандин кьил, насигьатчи, халис инсанперес тир ам хуьруьн агъсакъалрин советдин членни я.
Хидир бубадин хизанда 4 гадани 4 руш чIехи хьана.
Гьуьрметлу ветеран, чна ваз мукьва жезвай 90 йисан юбилей рикIин сидкьидай мубаракзава. Къуй квехъ чандин сагъвал хьурай!
Вадим Жамалдинов
