Къадим заманайрилай инихъ авай адет я: инсан дуьньядал атай­ла­, цIийи шегьер эцигайла, абуруз тIва­­рар гу­да. Хуьрел, куьчедални тIва­­рар эциг­да­.

Адет тирвал, виридаз машгьур, Ватан патал хъсан кIвалахар авур инсанрин тIварарихъни гьамишалугъ рикIера амукьун патал, заводар, институтар, пар­кар, куьчеяр яда.

Зи рикIел аламайвал, чи хуьруьн куь­чейризни 1988-йисуз тIварар ганай. Гьайиф хьи, чи балайриз куьчеяр кIва­чихъ янавай баркаллу рухвайрикай са затIни чизвач.  Са сеферда виняй агъуз къвезвай аялри чпи-чпиз суалар гуз, и куьчедиз тIвар ганвай, кас вуж я лугьуз, веревирдер ийизвай. Зани абуруз чи хуьруьнви — ци­цIигъви Гуьлмегьамедов Ибрагьимакай ихтилатна. Дугъриданни, Гуьлмегьамедов Ибрагьим лайихлу инсан тир.

Ам 1922-йисуз виликан Кьасумхуьруьн райондик акатзавай ЯркIи дередин хуьрерикай сад тир Ци­цIи­гъа Гуьлмегьа­мед ва Зилиха Гуьлмегьамедоврин хизанда дидедиз хьана.

1932-йисуз хуьре ачухнавай мектебда кIелна. Гуьгъуьнлай кIелунар Рухунрин хуьруьн мектебда давамарна. Мектеб акьалтIарайдалай гуьгъуьниз Ибрагьим Избербашда яшамиш жезвай чIехи вах Магьиятан, езне Куруман мукьув фе­­на ва гьана механический мастерскойда рабочийвиле кIвалахал акъвазна.

Жегьилдиз дяве башламиш же­дал­ди Яру Армиядин жергейриз эвер га­на. Дяведин сифте йикъалай эхирдалди душмандихъ галаз женг чIугуна. Япония­­­ муьтIуьгъардай женгерани ишти­ракна.

Алай вахтунда чи хуьре яшамиш жезвай агьил инсанрин гафарай, капи­тан, разведротадин командир Ибрагьим­ Япониядихъ галаз дяве куьтягь жедалди са югъ амаз телеф хьана. И чIулав ха­бар гваз ЦицIигъиз гьа вахтунда Кьасумхуьруьн райондин военный комиссар Золотухин 1945-йисан сентябрдиз атанай. Ада Ибрагьим дяведин йисара лайихлу хьайи орденарни медалар адан диде Зилихадив вахканай.

Гьуьрметлу чи хуьруьн аялар, и куьчедиз чи хуьруьнви, игитвилиз лайихлу кьегьал хва Гуьлмегьамедов Ибрагьим Гуьлмегьамедовичан тIвар ганва. Чир хьухь, рикIел хуьх, къагьриман рухвайриз ухшарбур жез алахъа.

Тегъи Мегьамедов