Сергьятчийрин къуллугъ лап четинди ва вини дережадин жавабдарди, гьа са вахтунда гзаф гьуьрметлудини я. Сергьятдал къуллугъай, Ватандин вилик вичин буржи тамамарай ва гилани тамамарзавай гьар са касди, и гафарин кIаникай къул чIугвада.
Алатай асирдин пудкъад лагьай йисарин гзаф жегьилриз хьиз, зазни пуд йисалайни гзаф вахтунда СССР-дин пограничникрин кьушунрин жергейра къуллугъ авун кьисмет хьана, Кьиблепатан сергьятдал, Азербайжанда Араз вацIун къерехрал.
Гзаф йисар алатнатIани, зи рикIелай сергьятдал къуллугъай вахт ва хьайи дуьшуьшарни алатнавач. Гьар сеферда 28-май мукьва хьайила, санал къуллугъай юлдашар, дустар рикIел хквезва, “дозордиз”, “секретдиз”, “сергьятдин часовойвилиз” югъди ва йифдини фейи жигъирарни кваз вилерикай карагзава.
За къуллугъай Яру Пайдах авай погранотрядда 65 кас дагъустанвиярни авай. Пуд вацран махсус вердишвилер ва гьазурлухвилер акьалтIайла, дагъустанвияр тир Пайзуллаева (аварви) ва Суйначханова (Хасавюртдай тир чеченви) захъ галаз санал са погранзаставадал къуллугъна. Абурухъ галаз за гилани алакъа хуьзва. Чи застава сергьятдин лап гзаф жавабдар чкадал алай. Араз вацIун а пата авай (чи заставадин къаншарда) Ирандин сергьятчийрин Асландуз лугьудай пост датIана чи гуьзчивилик квай.
За къени са кардал дамахзава хьи, Ватандин сергьятдал къуллугъай йисар зун патал шад гьиссерив, лишанлу вакъиайрив ацIайбур хьана. Агалкьунралди къуллугъунихъ галаз санал за отряддин общественный уьмуьрдани активвилелди иштиракна — заставадин комсомолрин тешкилатдин секретарвилин, “Чекист” тIвар алай цлан газетдин редакторвилин, мукьув гвай Агьмедаллар хуьруьн юкьван мектебдин ЮДП-дин (юные друзья пограничников) отряддин командирвилин везифаярни тамамарна. Аскервилин кьвед лагьай йисалай гатIунна, закай Закавказьедин пограничный округдин “На рубежах Родины” газетдин (ам Тифлисда акъатзавай) военкорни хьана. А чIавуз газетдин редактор, подполковник Чудинован къул алаз гайи военкорвилин шагьадатнама ва гьуьрметдин хейлин грамотаяр за гилани жуван архивда багьа ядигарар хьиз хуьзва. Аскервилин йисара зун “Отличный пограничник”, “Отличник Советской Армии” знакризни лайихлу хьана.
Заставадин начальникдин патай ихтияр аваз, за чкадин агьалийрихъ галаз дуствилин сих алакъаяр хвена. Чи заставадилай тахминан 3-4 версинин яргъа авай Араятлы хуьруьн “1-Май” колхоздин председатель, машгьур памбагчи, пуд сеферда Социализмдин Зегьметдин Игит Шамама Гьасановадихъ галазни таниш хьана. Ада чи заставадиз ийизвай къаюмвиликай округдин ва “Бакинский рабочий” газетриз макъалаяр кхьена. Гзаф къени инсан ва мергьяматлу рикI авай и кьегьал дишегьлиди вацра кьвед-пуд сеферда чи заставадин столовойдиз пулсуздаказ нек, какаяр ва ципицIар ракъурдай, суваррин йикъара уьмуьрдин юлдашни галаз къвез, савкьатар гваз сергьятчийриз мугьман жедай.
Къуллугъ гьикьван жавабдарди тиртIани, сергьятчи хьайи йисара за жуван яратмишунарни акъвазарнач, “Коммунист” (гила “Лезги газет”) ва “Комсомолец Дагестана” газетриз дагъустанвийри сергьятдал гьикI къуллугъзаватIа, мукьвал-мукьвал макъалаяр кхьена, шиирарни теснифна. Ингье абурукай сад:
Зун сергьятдал алатIани яргъал тир
Хайи дагълар, куьн зи рикIе авазва.
Инин памбаг куь живедин маргъалриз
Ухшарзава, куь гарни зав рахазва.
Зун сергьятдал. Ватан ава ахвара,
Адан гару хуш майилар гъизва заз.
Вил элкъуьриз кьиблепатан накьварал,
Лезги чилин веси рикIе хуьзва за.
Араз вацIун къваларив гвай сергьятдихъ галаз мад са кар алакъалу я. Гьа за къуллугъай заставадал, вахт атайла, зи хва Заурани къуллугъна. Килиг гьа, гьикьван маракьлувал ва бахтлувал ятIа! ГьакI хьайила, зунни зи хва кьведни виликан сергьятчияр я. Чна къуллугъай погранчастни гила Дербентдиз хтанва.
За виликан ва гилан сергьятчийриз сувар мубаракзава, абурухъ сагъламвал ва къуллугъдин рекьяй агалкьунар хьана кIанзава!
Нариман Къарибов
