Махсус серенжемдикай
3-октябрдиз РФ-дин оборонадин министерстводи малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 310 самолет ва 155 вертолет, зенитный ракетайрин 378 комплекс, пилот галачиз лув гудай 2137 аппарат, 5292 танк ва дяведин маса машинар, РСЗО-дин 860 машин, артиллериядин ва маса 3444 яракь, военный махсус 6189 автомашин тергна.
Гьелелиг тестикьардач
Туьркиядин президент Р.Т.Эрдогана тагькимарнавайвал, эгер Швециядини Финляндияди хиве кьур крар тамамар тавуртIа, кеферпатан и кьве уьлкве НАТО-дик экечIунин гьакъиндай тир арза тестикьардач. “Новости” РИА-ди хабар гузвайвал, идакай Эрдогана уьлкведин парламентда рахадайла малумарна.
“Чи уьлкведиз хиве кьур крар кьилиз акъуд тавунмаз, чна чи кьетIи фикир хуьда”, — лагьана туьркерин регьберди.
Чешмедин делилралди, алай вахтунда НАТО-дин 30 члендикай-уьлкведикай 28-да Швецияни Финляндия альянсдик экечIун тестикьарнава. Тестикьар тавунвайбур Венгрияни Туьркия я.
Къейд ийин, идалай вилик кеферпатан кьве уьлкведи НАТО-дик экечIунин гьакъиндай арзаяр вугайла, Анкаради гьасятда разивал ганай. Нетижада Мадридда пуд терефдин арада меморандум кутIуннай. Адал асаслу яз, эгер Швециядини Финляндияди Туьркиядин са жерге истемишунар кьилиз акъудайтIа, уьлкведи кеферпатан уьлквеяр НАТО-дик экечIуниз са манийвални гудач. Кьилди къачуртIа, Швециядини Финляндияди Туьркияди террориствилинди яз гьисабзавай Куьрдистандин рабочий партиядиз куьмекар гун акъвазарун герек я.
Къведай сеферда
Госдумадин спикер Вячеслав Володина малумарайвал, Россиядин цIийи регионрин патай Госдумадин депутатар къведай созывдин вахтунда хкяда.
“Кьуд субъектдин — РФ-дин цIийи регионрин — патай депутатар хкягъунин сечкияр тайинарнавай вахтунда кьиле фида”, — лагьана ада.
Кьенятзава
Франциядин президент Э.Макрона вичин нубатдин рахунар сифте яз водолазка алаз авуна. Къейдзавайвал, адетдин перемринни галстукрин чкадал, чими ийидай системадиз ийизвай харжияр кьенятунин мураддалди, Франциядин чиновникри водолазкаяр алукIун кьетIнава.
“Новости” РИА-ди хабар гузвайвал, идалай вилик Франциядин финансрин министрди электроэнергия кьенятунин макьсаддалди чиновникри чими парталар алукIдайдакай ихтилатнай. Санлай къачурла, гьукумдарриз энергия ишлемишун 10 процентдин тIимилардай къаст ава.
США Гитлерав гекъигна
РФ-дин МИД-дин кьил Сергей Лаврова малумарайвал, США-ди, РагъакIидай патан уьлквеяр вичиз муьтIуьгъарна, Гитлеран жуьреда гьерекатзава. Министрди Госдумада лагьай фикирар “Новости” РИА-ди раижнава.
Ада къейд авурвал, Украинадикай Россиядиз акси дяведин алат туькIуьруналди, США-ди РагъакIидай патан вири уьлквеяр табийвилик кутунва. “Вичин вахтунда Гитлерани, Советрин Союздал гьужум авун патал, Европадин чIехи пай уьлквеяр ружадин хурук кутунай”, — лагьана ада. Алава хъувурвал, Гитлеран планриз хьиз, США-дин къастаризни кьилиз акъатун “кьисмет жедач”.
Тахсир кутуна
Эрменистандин оборонадин министерстводи хабар ганвайвал, 3-октябрдин йифен береда Азербайжандин яракьлу къуватри часпардин патав гвай абурун мулкариз цIай гана. Эрменистандин МИД-дин векилдин гафар “Новости” РИА-ди раижнава.
Жавабдин гуьлле хгунин нетижада ягъунар акъвазна. Идалай вилик Эрменистандин терефди есирвиле гьатай аскерар азербайжанви аскерри гуьлле гана кьиникьихъ галаз алакъалу делилдай инсандин ихтияррин гьакъиндай Европадин ва ООН-дин вири халкьарин судриз арза вуганай. Арзадихъ эрмени аскерар кьейи агьвалат къалурзавай видеокхьинар гилигнавай.
Къуватар артухарзава
Белоруссиядин президент А.Лукашенкоди малумарнавайвал, Польшади Белоруссиядин часпардив военный къуватар артухарзава, Литвадизни и жигьетдай гуьгъуьна амукьиз кIанзавач. «Белта» чешмедин делилар “Новости” РИА-ди раижнава.
Президентдин делилралди, Белоруссиядихъ галаз уртах сергьятар авай уьлквейра тахминан 25 агъзур касдикай ибарат НАТО-дин дестеяр ава.
Кьадар гьисабна
Алай йисан 21-сентябрдилай 200 агъзур россияви Къазахстандиз гьахьна ва 147 агъзур кас анай эхкъечIна. “Новости” РИА-ди раижнавайвал, идакай Къазахстандин МВД-дин кьил Марат Ахметжанова хабар ганва.
«Лезги газет»
