Алатай жуьмядиз Махачкъалада СССР-дин композиторрин Союздин член, РФ-дин ва РД-дин искусствойрин лайихлу деятель, госпремийрин лауреат Мегьамед Азизханович Гьуьсейнован къамат эбеди яз рикIера хуьнин лишан яз ам яшамиш хьайи кIвалерин цлал мемориалдин кьул алкIуруниз талукьарнавай мярекат кьиле фена. Аниз Дагъустандин культурадин министр З.Бутаева, М.Гьуьсейновахъ галаз санал кIвалахайбур, устаддин яратмишунриз къимет гузвай, адан экуь къамат рикIера хуьзвай гзаф ксар атанвай.
— Рутул райондин Хъуьлуьдрин хуьре дидедиз хьайи, Махачкъалада музучилище, Москвада культурадин госинститут акьалтIарай Мегьамед Азизхановича вичин вири уьмуьр культура хуьниз ва вилик тухуниз бахшна. Ам дерин чирвилер авай пешекар, жегьилрин насигьатчи тир. Композитор яз ада чаз тунвай зурба ва кьетIен ирс, жуьреба-жуьре жанрайрин 200-далай виниз эсерар: “Шарвили” опера, “Дагъустандин музыкадин рангар” тIвар алай симфониядин сюита, “Эмин” драмадин поэма ва гзаф масабур Дагъустандин музыкадин къизилдин фондуна гьатнава. М.Гьуьсейнов хейлин шабагьриз лайихлу хьана. Амма виридалайни кьилин шабагь адан тIвар инсанри рикIера хуьн, амукьун я. Къе чна Мегьамед Гьуьсейнован къамат эбеди яз рикIера хуьн патал мад са кам къачунва, — къейдна Зарема Бутаевади.
М.Гьуьсейнован ватанпересвилин, инсанвилин виниз тир ерияр, регьбервилин бажарагълувал РД-дин музыкантрин Союздин правленидин председатель Х.Баширова, композитор Р.Фаталиева, “Дагъустан” ГТРК-дин директордин заместитель С.Хавчаева, Дагъустандин балетдин ва операдин гостеатрдин директор М.Абасова, РФ-дин лайихлу артистка З.Абдуллаевади чими келимайралди рикIел хкана.
— Мегьамед Азизханович девлетрихъ калтугай кас туш. Ам патал кьилинди руьгьдин девлет тир. Са мисал гъин. 1985-йисуз Москвадиз кIелиз фейи ам, вири хьиз, уьлкведин меркездиз тамашиз ваъ, ГДРЗ-диз (государственный дом радиовещания и звукозаписи) фена. Дагъустандин композиторрин эсеррин сиягьдиз тамашна. Ана авайди лап тIимил эсерар тирди акурла, ада и кар гьакI тунач. М.Гьуьсейнов кьилин редактордихъ галаз гуьруьшмиш хьана, вичин наразивал къалурна. Ада и “гъалатI” арадай акъудун хиве кьуна. Са тIимил вахтни арадай фенач, Дагъларин уьлкведиз записар авун патал комиссия атана. Ахпа чи композиторрин эсерар Вирисоюздин радиодай гуз эгечIна, — рикIел хкана Салам Хавчаева.
Мярекатдал хизандин тIварунихъай рахай Мегьамед Гьуьсейнован руш Гуьзел Агьмедовади, уьмуьрдин юлдаш Бедирнисе Наврузовнади ва мукьва-кьили Асият Шамиловнади мярекатда иштиракай ксариз сагърай лагьана.
Дугъриданни, мярекат, Мегьамед Гьуьсейнован эсерри хьиз, рикIериз чим гудайди, лап таъсирлуди хьана (ам акьалтIайлани инсанри хъфиз тади къачузвачир).
Къейд ийин хьи, мемориалдин кьулунин автор чи машгьур ватанэгьли, Россиядин ва Дагъустандин халкьдин художник Гьейбат Гьейбатов я.
Рагнеда Рамалданова
