1-октябрдиз лезгийрин машгьур шаир, хейлин йисара Дагъустандин ктабрин чапханада, “Коммунист” газетдин редакцияда отделдин заведующий, “Литературадин Дагъустан” журналдин лезги выпускдин редактор, “Литературадин Дагъустан” ва “Кард” журналрин (абур ирид чIалал акъатзава) сад хъувунвай редакциядин кьилин редактор яз кIвалахай Азиз Алем (Фатуллаев Азиз Шихбинетович) рагьметдиз фена.
А.Ш.Фатуллаев 1938-йисан 19-февралдиз Бакуда дидедиз хьана. Буба фронтдиз фейила, хизан Докъузпара райондин Мискискарин хуьруьз куьч хъхьана. Усугъчайдал юкьван мектеб акьалтIарайдалай кьулухъ, ам Дагъустандин пединститутдин тарихдинни филологиядин факультетдик экечIна, гуьгъуьнлай кIелунар урус ва Дагъустандин чIаларин отделенида давамарна. Анжах азарлувал себеб яз адавай вуз акьалтIариз хьанач.
1965-йисуз Азиз Алем Москвада М.Горькийдин тIварунихъ галай Литературадин институтдик экечIна. 1970-йисуз анаг акьалтIарайдалай кьулухъ жегьил литераторди Дагъустандин печатдин жуьреба-жуьре органра кIвалахна.
Литературадин алемдиз ам сифте критик яз атанай. Жегьил критикдин сад лагьай макъала (Къ.Межидован “Лувар квай дустар” ктабдиз кхьенвай рецензия) 1956-йисуз “Комсомолец Дагестана” газетда чапнай. Гуьгъуьнлай Азиз Алеман яратмишунрин кьилин рехъ шииратдихъ галаз алакъалу хьана. 60 йисалай виниз “эдебиятдин никIе” бегьерлудаказ зегьмет чIугур шаирдин къелемдикай 12 ктаб хкатна: “Алмасдин кIусар”, “Лацу цифер”, “Са къужах нурар”, “Рехи тар”, “Хияларни цIайлапанар”, “Гьуьлуьн зенгер”, “Муьжуьд лагьай цав”, “Мидаим легьзе”, ”Суьгьуьрдин ялав”, “Лекьрен гвен”, “Крчар алай лам”, “Къакъаравай сабур”. Вишералди шиирар газетризни журналриз акъатна. Шаирдин эсерар гьакIни антологийра, хрестоматийра, учебникра гьатнава, адан яратмишунар республикадин мектебра, вузра чирзава.
Азиз Алеман шииратдин дуьньядин кьетIен лишанрикай сад тематикадин гегьеншвални кIалубринни жанрайрин жуьреба-жуьревал я. Шаирди дуьньядин шииратдай лезги литературадиз цIудралди жанраяр гъана. Идалайни гъейри, ада вичини хейлин цIийи кIалубар туькIуьрна. Абурукай гегьеншдиз Ж.Гьасановадин “Лирика Азиза Алема” ктабда, М.Ибрагьимован илимдин макъалайра раханва.
А.Алема лезги литература патал чIехи ирс тунва. Чаз малум тирвал, адан къелемдикай хкатнавай вишералди эсерриз дуьнья акунвач. Гена шаирдихъ милли публицистикадин, эдебиятдин къадир авай веледар ава. Фикирдиз адан хва — Милрад Фатуллаев, руш — Райсама Фатуллаева къвезва. Абур къадирлу ирсдарар тирдал шак алач.
Шаир 2-октябрдиз Мискискарин хуьре кучукна. Чна Азиз Шихбинетович Фатуллаев рагьметдиз финихъ галаз алакъалу яз адан хизанриз, вири мукьва-кьилийриз башсагълугъвал гузва. Азиз Алеман экуь къамат чи рикIера эбеди яз амукьда.
“Лезги газетдин” редакциядин коллектив
