И йикъара чав чIулав хабар агакьна: яргъалди чIугур залан азардикди машгьур публицист, аграрник-экономист, экологиядин рекьяй алим — ахтармишунардайди, хейлин йисара чи газетдин редакцияда хуьруьн майишатдин отделдин заведующийвиле кIвалахай Аламудин Кьадиевич Шихрагьимов рагьметдиз фена. Ам чидай ва адахъ галаз санал кIвалахай вирибуру яс чIугвазва, багърийриз сабурар гузва.
А.Кь.Шихрагьимов 1932-йисуз Мегьарамдхуьруьн райондин ЦIелегуьнрин хуьре дидедиз хьана. Кьасумхуьрел юкьван школа, Махачкъалада хуьруьн майишатдин институтдин агрономвилин факультет акьалтIарна. Адалай кьулухъ гагь республикадин хуьруьн майишатдин министерствода, гагь жуьреба-жуьре майишатра руководство гудай ва тешкилдай кIвалахар бегьемарна. 1961- 1973-йисара республикадин “Коммунист” газетда (гилан “Лезги газет”) лап кар алай чIехи отделдин кIвалах виликди тухвана. Газетдин къваларив еке десте журналистар — хуьруьн майишат, экономика, аграрный илимар чидай ксар агудна, абуруз махсус чирвилер гана.
Эхиримжи йисара Аламудин Кьадиевича РАН-дин ДНЦ-дин Прикаспийский зонадин тIебиатдин девлетрин институтдин къуллугъчивиле кIвалахзавай, вичин вири алакьунар ва чирвилер чи республикадин гьуьлуьз мукьва мулкарал чилер хуьнин ва абурукай бес кьадарда менфят хкудунин месэлайрал желбна. Зегьметда ва илимда къазанмишай агалкьунар адаз Дагъустан Республикадин лайихлу экономистдин гьуьрметдин тIвар ва маса шабагьар гуналди къейдна.
Вичин насигьатчивилин рехъ ада уьмуьрдин эхирдалди давамарзавай. Рагьметлудан журналиствилин — публициствилин ирс, илимдин лап хъсан теклифар чав гума.
Чна рагьметлудан хизандиз, ам чидайбуруз, дериндай хажалат чIугунивди, башсагълугъвал гузва. Аламудин Кьадиевич Шихрагьимован экуь къамат чи рикIелай садрани алатдач.
“Лезги газетдин” редакциядин коллектив
