Дагъустандин тIебиатдин шартIари республикада набататчивилин гьар жуьре хилер виликди тухун патал хъсан мумкинвилер ачухзава. Гьа жергедай яз, чи республикадихъ багъманчивилин хел виликди тухун патал вири шартIар ава.
Алай вахтунда Дагъустанда 25,2 агъзур гектар багълар бегьер гудай гьалда ава. РД-дин хуьруьн майишатдин ва недай суьрсетдин министерстводин делилралди, 30-сентябрдалди багъларай бегьер 18 агъзур гектар майданрай кIватIнава. Бегьерлувал са гектардай юкьван гьисабдалди 91,3 центнердиз барабар яз, 164 агъзур тонн емишар вахчунва. Гьа гьисабдай яз, 40 агъзур тонн машмашар, 11 агъзур тонн пIинияр, 26 агъзур тонндилай гзаф хутар, 21 агъзур тонн шефтелар, тахминан 46 агъзур тонн ичер ва 4,4 агъзур тонн хвехвер.
Дагъустандин 60 процентдив агакьна багълар Мегьарамдхуьруьн, СтIал Сулейманан, Хасавюрт, Буйнакск, Дербент, Ахцегь, Гергебил ва Табасаран районра ава. Эхиримжи йисара, государстводин патай гузвай куьмек артухарунин нетижа яз, республикада гзаф йисара экъечIдай набататри кьунвай майданар хейлин гегьенш хьанва. Еке фикир фад арадал къведай ва булдиз бегьер гудай жуьредин багълар кутунин месэладизни гузва.
РикIел хкин, 2021-йисуз Дагъустан Республикада 200,3 агъзур тонн емишар кIватIнай. 2010-йисан делилрив гекъигайла, им саки 2 сеферда артух я.
Чи мухбир
