Дагъустанда майвачивилел ва картуфчивилел машгъул ксарив 2023-йисуз государстводин патай цIийи жуьредин куьмек агакьда. Идакай ислендиз РД-дин Гьукуматдин Председатель Абдулмуслим Абдулмуслимова ихтилатна.
Адан гафаралди, салан майваяр, гьа жергедай яз картуфар гьасилунихъ авай еке метлеб фикирда кьуналди, сифте яз ихьтин куьмек хсуси майишатрив (ЛПХ) агакьда. Кьилди къачуртIа, аграрийривай салан майваяр гьасилуниз, сечме тумар маса къачуниз, гьакIни агротехнологиядин кIвалахриз харж авур такьатрин са тайин кьадар эвез яз вахчуз жеда.
“Алай вахтунда бегьер кIватIунин серенжемар давам жезва. Гьавиляй кардик квай техника бес кьадарда аваз хьун гзаф важиблу я. Техникадин гьазурлухвилихъ галаз сад хьиз, гьелбетда, вахтунда амаз абур ГСМ-далди таъминарунин месэлани гьялун герек я. РикIел хкиз кIанзава хьи, бегьер неинки кIватI хъувун, гьакI еридиз зарар тежедайвал хуьнни лазим я”, — лагьана премьер-министрди.
«Лезги газет»
