4-октябрдиз Дагъустандин Кьил Сергей Меликован регьбервилик кваз республикадин армиядин жергейриз эвер гуниз талукь комиссиядин гегьенш заседание кьиле фена.
“Лезги газетдиз” РД-дин Кьилин пресс-къуллугъди хабар гайивал, мярекат уьлкведа малумарнавай тамам тушир мобилизациядихъ галаз алакъалу месэлаяр веревирд авунилай гатIунна. С.Меликова къейд авурвал, тамам тушир мобилизациядин жигьетдай эвел кьиляй республикада кьиле тухвай кIвалахда са жерге гъалатIриз рехъ ганвай. Абур арадай акъудунин макьсаддалди исятда и месэла кьетIен гуьзчивилик кутунва.
Тамам тушир мобилизациядин сергьятра аваз Дагъустанда кьиле тухузвай мярекатрикай гегьеншдиз РД-дин военный комиссар Дайтбег Мустафаева ихтилатна. Адан гафарай малум хьайивал, республикадин бязи муниципалитетра и месэладиз талукь кIвалах акьалтIарнава.
Д.Мустафаеван докладдиз баянар гудайла региондин Кьили къейдна: “Къенин юкъуз чна кьилиз акъудзавай везифайрин кьилин макьсад уьлкведин оборона мягькемарун я. Са шакни алачиз, бязи военкомрин гьакъиндай идалай кьулухъ тайин тир серенжемарни кьабулда. Гьа са вахтунда заз вилик эцигнавай везифайрив намуслувилелди эгечIай шегьеррин, районрин кьилериз сагърай лугьуз кIанзава”.
РД-дин Гьукуматдин Председателдин заместитель Рамазан Жафарова тамам тушир мобилизациядин сергьятра аваз дяведин рекьяй къуллугъ авуниз эвер ганвай дагъустанвияр авай пунктара, частара тешкилнавай шартIарикай хабар гана. Кьилди къачуртIа, дагъустанвияр гьихьтин гьалара яшамиш жезватIа ахтармишун патал республикадин государстводин органрин, жемиятдин, диндин векилрикай, депутатрикай ибарат пуд десте тешкилнавай. Абур Чечняда, Буйнакскда ва Каспийдин флотилияда кардик квай пунктариз мугьман хьана.
И месэладин гьакъиндай вичин фикирар лугьудайла С.Меликова къейд авурвал, алай вахтунда Украинада кьиле физвай махсус операцияда иштиракзавайбур, дяведин генераларни галаз, къенин юкъуз повесткаяр къвезвайбур ва я гуьгьуьллудаказ военкоматриз физвайбур патал акьалтIай чешнеяр я. “Абурукай садни зурзазвач. Абур чпин къуватрихъ агъанва ва Ватанди чпел ихтибарнавай везифа кьилиз акъудунал лайихлудаказ дамахзава”, — алава хъувуна Дагъустандин Кьили.
Тамам тушир мобилизациядин сергьятра аваз республикадин шегьерринни районрин кьилери тухузвай кIвалахдикай гегьеншдиз РД-дин Кьилин ва Гьукуматдин Администрациядин Руководитель Алексей Гьасанова ихтилатна.
Сергей Меликова кьейибуруз ва набутриз повесткаяр атанвай районрин, шегьеррин военный комиссаррин кIвалахриз юридический рекьяй дуьзгуьн къимет гун тапшурмишна.
“Повесткаяр агакьай ихьтин хизанар гьихьтин гьалда хьун мумкин ятIа фикирдизни гъиз жезвач”, — лагьана республикадин Кьили, ихьтин гьерекатрилай вичин наразивал къалуруналди.
РД-дин прокурор Алексей Ежова ихьтин гьар са дуьшуьшдин гьакъиндай ахтармишунар кьиле тухудайди хиве кьуна ва тамам тушир мобилизациядиз талукь яз агьалийрилай къвезвай арзайриз килигдай махсус десте тешкилнавайдакай хабар гана. Къейд ийин хьи, и дестедик акатнавай пешекарар агьалийрин ихтиярар чIурнавай дуьшуьшарни винел акъудунал машгъул жезва.
Жегьилрихъ галаз кьиле тухузвай кIвалахдикай РД-дин жегьилрин крарин рекьяй министр Камил Саидова суьгьбетна. Дагъустандин милли сиясатдин ва динрин крарин рекьяй министр Энрик Муслимова вичи регьбервал гузвай ведомстводи ДГУ-дин Координационный центрадихъ галаз санал “Открытый диалог” проектдин сергьятра аваз республикадин 19 вуздани ссузда жегьилрихъ галаз гуьруьшар кьиле тухванвайдакай хабар гана.
С.Меликова жегьилриз ватанпересвилин тербия гунин, абурук ватанпересвилин руьгь кутунин жигьетдай кьиле тухузвай кIвалахрилай вичин разивал къалурна ва и карда министерствойриз куьмекар гузвай диндин ва жемиятдин тешкилатрин векилриз сагърай лагьана.
Тамам тушир мобилизациядиз талукь месэлайрин гьакъиндай РД-дин Хатасузвилин Советдин Секретарь, РФ-дин Игит Мегьамед Баачиловни рахана. Вичин рахунра ада дяведин рекьяй къуллугъ авуниз эвер гуникай кьил къакъудзавайбуруз гьар са итимдин ивидик хьун герек тир къастунин кIевивал рикIел хкун теклифна.
РД-дин промышленностдин ва алишверишдин министр Низам Халилова заседанидин сергьятра аваз Украинада кьиле физвай махсус операциядиз физвайбуруз жуьреба-жуьре рекьерай куьмекар гун патал региондин промышленностдин ва алишверишдин карханайри кьиле тухузвай кIвалахдикай суьгьбетна. Кьилди къачуртIа, ихьтин карханайри чпин патай недай-хъвадай суьрсетдин наборар, электрочайникар, курткаяр, кIвачин къапар ва маса затIар чара авунва.
Заседанидин эхирдай Сергей Меликова РД-дин Кьилин ва Гьукуматдин Администрациядин, военкоматдин, Халкьдин Собранидин, прокуратурадин ва жавабдар маса органрин векилрикай ибарат десте арадал гъун ва республикада тамам тушир мобилизациядин жигьетдай кьиле тухузвай кIвалах адан кьетIен гуьзчивилик кутун тапшурмишна.
Агьмед Магьмудов
