Сьерра-Леонедикай делилар
— Сьерра-Леоне РагъакIидай патан Африкадин уьлкве я. Адан умуми майдан анжах 71740 квадратный километрдикай ибарат я.
— “Сьерра-Леоне” тIвар уьлкведиз 1462-йисуз гана. “Асланрин дагълар” лагьай чIал я.
— Санлай Сьерра-Леонедин агьалийрин кьадар (7,5 миллиондилай виниз) тахминан Санкт-Петербургдин агьалийрин кьадардиз барабар я.
— И уьлкведин меркез Фритаун я. Ингилис чIалай таржума авурла, “азад шегьер” лагьай чIал жезва.
— Британияди 1890-йисуз Сьерра-Леонеда чпин колониядин къайдаяр тайинарна. 1961-йисуз и уьлкве аслувиликай хкатна.
— Сьерра-Леонеда гьавадин чимивал +19 градусдилай агъуз садрани аватнавач. Гьа са вахтунда ана лап пара зегьемвилерни жезвач.
— Уьлкведин агьалийрин 90 процент чкадин чIехи 20 тайифадикай ибарат я.
— Чкадин агьалийрин чIехи пай мусурманар я.
— Уьлкведа официальный чIал ингилис чIал я. Амма ингилис чIал саки садазни чизвач, адакай менфят къачузвач. Агьалияр чкадин тайифайрин цIудралди нугъатрал рахазва.
— Сьерра-Леоне алмасрин девлетлу запасралди машгьур я.
— Уьлкведихъ хуьруьн майишатдин ва балугърин ресурсарни гзаф ава.
— И уьлкведин гьар кьвед лагьай агьали хуьруьн майишатдин кIвалахрал машгъул я.
— Сьерра-Леонедин итимрин са пай, дишегьлийрин чIехи пай чирвилер къачун тавунвайбур я.
— Сьерра-Леонедин хуьрерин агьалийрал крокодилри гьужумзава. Африкадин маса уьлквейрив гекъигайла, ана вацIар гзаф ава.
— Уьлкведа манго булдалди ава. И емиш вири чкайра маса гузва.
— Уьлкведин виридалайни кьакьан кукIуш Бинтимани дагъ яз гьисабзава. Тропикрин тамари кьунвай и дагъдин гуьнейра гзаф кьадарда гьар жуьре гьайванар яшамиш жезва. Уьлкведин гьайванрин алем гзаф девлетлуди я.
— Хъвадай хатасуз целди таъмин туширвиляй, санитариядинни гигиенадин шартIар пис тирвиляй, медицинадин зайифвиляй ва бес кьадар тIуьн гьат тийизвайвиляй Сьерра-Леонедин агьалияр яргъалди яшамиш жезвач. Юкьван гьисабдалди — 55 йисуз.
«Лезги газет»
