И йикъара чун журналиствилин пешеди Белиж поселокда яшамиш жезвай зегьметдин ветеран, пенсионер Алимет Алиметован кlвализ акъудна. Себебни “Лезги газетдин” 32-нумрадиз акъатнавай Хийир Эмирован макъала хьана. Ана белижви Алиметов Абдулмурадан кьегьалвилеракай куьруьдаказ кхьенвай: “Реактивный артиллериядин дивизиондин командирдин заместитель, майор Алиметов Абдулмурада махсус серенжемдив эгечlай сифте йикъарилай Донецкдин ва Луганскдин республикаяр хуьнин карда уьтквемвилелди иштиракзава. А.Алиметован жуьрэтлувилин ва пешекарвилин гьерекатри дивизиондиз командирри вилик эцигзавай тапшуругъар лап хъсандиз кьилиз акъуддай ва хуьрер Украинадин миллетчийрикай азаддай мумкинвал гузва.
Нубатдин сеферда женгиник экечlайла ва къайдадикай хкатнавай яракьар женгерин майдандай ахкъуддайла, Абдулмурада викlегьвал къалурна. Адан гъавурда аваз тешкилай гьерекатри хейлин яракьар ва женгинин машинар къутармишдай мумкинвал гана.
Алава яз, са женгина, душмандин акъваз тийизвай ягъунар квазни такьаз, майор Алиметова къайдадикай хкатай кьве машин ва маса яракьар саламат чкадиз акъудна. Ида дивизиондиз гуьгъуьнлай женг давамардай ва душмандиз дуьзгуьн жаваб гудай шартlар яратмишна”.
Кlвале чун Алимет халудин кайвани Телли дидеди кьабулна. Малум хьайивал, Алиметан кефияр авачир. Чна Телли дидедихъ галаз суьгьбетна.
Чун иниз къведайла, фикирда са Абдулмурад авай. Килигайтlа, Донбассдин республикада кьиле физвай военный махсус серенжемда Телли дидедин кьуд хцини иштиракзава.
Алиметов Алимет Сиражудиновичан бине Ахцегьай я. Ам 1956-йисуз Дербент шегьерда дидедиз хьана. Белиждин 1-нумрадин школа акьалтlарай ам Лабинск шегьердин технический техникумдик экечlна. Са куьруь вахтунда поселокдин консервиярдай заводда электриквиле кlвалахна. Ахпа Советрин Армиядин жергейра кьве йисуз къуллугъна. Армиядай хтай 1977-йисуз ам бине татарханви Адилов Къехлеран руш Теллидал эвленмиш жезва. Ахпа ам кlелиз Дондал алай Ростовдин ракьун рекьерин техникумдик экечlна, анаг хъсан къиметралди акьалтlарна. Пенсиядиз фидалди, 41 йисуз Белижда ракьун рекьерин подстанциядал дежурный электромеханиквиле кlвалахна.
Телли дидеди сифте къизилдин безекар гузвай туьквенда кlвалахна. Абдулмурад хва хьайидалай гуьгъуьниз ада, кlвалин кайвани яз, аялриз тербия гуз хьана.
Гележегдин офицеррин чlехи буба, Телли дидедин буба Адилов Къехлер, Ватандин Чlехи дяведин инвалид тир. Ам фронтдай кlвач галачиз хтанай. Хтулар Абдулмурадаз, Агъарагьимаз, Ямудиназ, Сиражудиназ ада вичин къвалав ацукьарна, инсанвиликай, Ватан хуьникай, фашистри Советрин инсанриз авур кьван зулумрикай… ихтилатар ийидай. Хтулри бубадин гафариз дикъетдивди яб гудай. Адан насигьатри абурун зигьинда гел туна. Бубадин руьгьдин лигимвилел дамахзавай хтулри военный рехъ хкягъун дуьшуьшдин кар туш.
Абдулмурадни Агъарагьим 1981-йисуз Белиж поселокда дидедиз хьана. Кьветхверар хьунал Алимет дахди пара шадвал авунай. Белиждин гимназиядин 1-классдиз стхаяр санал фена. Ана кlелзавай йисара классдин руководителди ва муаллимри диде-бубадиз аялриз дуьз тербия гунай ва тарсариз гьазур жез атунай сагърай лугьудай.
Школа акьалтlарайдалай гуьгъуьниз, 1999-йисуз, кьветхверар Россиядин Армиядин жергейриз фена. Са йисалай къуллугъдин везифаяр лайихлудаказ кьилиз акъудунай, ученийра ва женгинин гьазурлухвиле хъсан чирвилер ва алакьунар къалурунай кьве стхадизни командованиди 6 вацран прапорщиквилин школада кlелун теклифзава. Школа чешнелу чирвилер аваз акьалтlарай абуруз прапорщиквилин чин гана. Къуллугъ давамариз абур Къазанда авай военный частуниз ракъурзава. Ина йисни зура къуллугъна, кьведни военный училищедик экечlзава. Кьуд йисуз чирвилер къачур Абдулмурадни Агъарагьим Чечен Республикада авай военный частуниз рекье твазва. Танкарин частара къуллугъзавай майор Абдулмурад Алиметовичани капитан Агъарагьим Алиметовича Гуржистандинни Кьиблепатан Осетиядин ва 2014-2015-йисара Украинада кьиле фейи женгера иштиракна.
Хиве авай пак буржи намуслувилелди тамамариз уьлкведин итижар хуьнин карда викIегьвал къалурунай майор Абдулмурад Алиметов 2008-йисуз “За принуждение к миру” медалдиз, 2011-йисуз “За отличие в воинской службе” 3 -дережадин ва 2015-йисуз “За отличие в воинской службе” 2-дережадин, 2014-йисуз “Дирибашвиляй” медалриз, 2015-йисуз “20 лет 58-общевойсковой армии”, 2022-йисуз “За боевые отличия” медалриз лайихлу хьана. Капитан Алиметов Агъарагьим военный къуллугъдин ветеран я. Яргъал йисара гьакъисагъвилелди къуллугъ авунай адаз “За отличие в воинской службе” 3-дережадин медаль ганва.
Алиметов Ямудин 1987-йисуз дидедиз хьана. Белиждин гимназияда юкьван образование къачурдалай гуьгъуьниз ам Россиядин Армиядин жергейриз физва. 2006-йисуз амни, чlехи стхайрилай чешне къачуна, Москвадин высший военный училищедиз гьахьзава. Кьуд йисуз училищеда чирвилер къачур ам Челябинскдин областдин Чебаркуль шегьерда авай военный частуниз ракъурзава.
2000-йисан декабрдин эхиррилай 2001-йисан майдалди Сирияда кьиле фейи военный серенжемда иштиракна.
Уралдин танкарин соединенидин мотострелковый ротадин командир, капитан Ямудин Алиметов “За отличие в воинской службе” 3-дережадин, “Участник военной операции в Сирии”, “За заслуги в борьбе с международным терроризмом”, “За боевые отличия” ва Суворован медалриз лайихлу хьанва.
Адан алакьунрикайни агалкьунрикай Центральный военный округдин “Уральские военные ведомости” газетдин 2020-йисан 6-нумрада гегьенш макъала ганва.
Мартдин вацра военный махсус серенжемда иштиракдайла, хирер хьана, кьве вацра госпиталда хьана. Майдин юкьвара отпуск гайила, кlвализ хтана, бубадални дидедал кьил чlугуна. Сагъламвал мягькемар хъувуна, диде-бубадиз руьгь секинардай ихтилатар авуна, ам, къуллугъ давамариз, вичин частуниз хъфена.
Гъвечlи хва Алиметов Сиражудин 1995-йисуз дидедиз хьана. Адани Белиждин гимназияда хъсан къиметар аваз 11-класс акьалтlарна. Кlелиз Омскдин военно-автомобильный институтдиз гьахьна. Кьуд лагьай курс акьалтlарайла, ам стажировкадиз маса военный частуниз ракъурзава. Ина адан алакьунар, чирвилер, низамлувал акуна. Гъилик квайбурни дуьзгуьндаказ вердишарунилай, са лекени квачиз къуллугъ авунилай командованиди разивална. Стажировка куьтягь хьана хъфидайла, чухсагъулдин чарни гана.
2022-йисан сифте кьиляй С.Алиметова икьрар кутlунна. Алай вахтунда ада, 1941-1945-йисара чlехи буба Къехлера ва гила чlехи стхайри хьиз, фашистрихъ галаз жунг чIу-гун вичин буржи яз гьисабзава.
Сагърай чеб вири викIегь рухваяр!
Къагьриман Ибрагьимов
