Республикадин лежберар горчица (чиляй экъечIдай ва вичин дувулрикай хуьрекдихъ галаз ишлемишдай кудай затI гьазурдай набатат) гьасилунив эгечIнава, хабар гузва РД-дин хуьруьн майишатдин ва недай суьрсетдин министерстводин пресс-къуллугъди.
Идарадин векилдин гафаралди, и йикъара Дагъустандин хуьруьн майишатдин ва недай суьрсетдин министрдин сад лагьай заместитель Шарип Шарипов кIвалахдин рекьяй Хасавюрт райондиз мугьман хьана ва муниципалитетдин хуьруьн майишатдин управленидин начальник Идрис Загалов ва РД-дин багъманчийрин союздин регьбер Сайдулла Орусханов галаз горчица цунин кIвалах кьиле физвай гьал ахтармишна.
Идрис Загалован гафаралди, 2022-йисуз зулун магьсулар цазвай майданар Хасавюрт районда 2 агъзур гектардилай гзаф гегьеншарнава, анжах техил ина 19 агъзур гектардин чилел цадайвал я. Алай вахтунда районда зулун магьсулар цунин кIвалахдиз гьазурвал аквазва.
Горчица цунин проект теклифай Сайдулла Орусханова къейд авурвал, и культура Дагъустан патал цIийиди я. Алай вахтунда Эндирей хуьре горчица 460 гектар чиле цазва.
Проект кьилиз акъудунин карда Вирироссиядин ягълу квай культурайрин НИИ-дин ва Вирироссиядин дуьгуьдин НИИ-дин алимри меслятралди куьмек гузва. Майишатда гьар са гектардай 15 центнердилай тIимил тушиз горчицадин тумар кIватIун планламишнава. Алай вахтунда абур маса гуниз талукь сифтегьан икьрарар кутIуннава.
“Горчица зулун магьсулар цадалди вилик гьасилдай лап хъсан набатат я. Ада накьвадин гьал хъсанарзава, техил гьасилунин карда ам важиблу “гьалкъа” я. Кьилинди ам я хьи, горчица хийир гъидай культурайрин жергеда ава. Чна ихьтин камарин тереф хуьзва ва ахтамишунар кьиле тухуз кичIе тушир майишатриз куьмек гуз гьазур я. Эгер нетижа агалкьунринди хьайитIа, ихьтин тежрибаяр чна артухарда”, — къейдна Ш.Шарипова.
И йикъара кьиле фейи региондин АПК-дин оперативный штабдин заседанидал Шарип Шарипова хабар гайивал, зулун магьсулар алай йисуз Дагъустанда 96 агъзур гектардин майданра цада.
РД-дин хуьруьн майишатдин ва недай суьрсетдин министерстводин делилралди, 96 агъзур гектардикай тахминан 78 агъзур гектарда зулун къуьл цадайвал я.
“Къенин йикъалди, хабар гузвайвал, зулун магьсулар цун фикирда кьунвай чилин 50 процент майданда и кар кьилиз акъуднава, тумаралди таъминвал 60 процентдиз барабар я”, — къейдзава министерстводи.
Ш.Шарипова рикIел хкайвал, алай йисан 1-сентябрдилай техилдин комплексдин иштиракчияр и культурадал ва адакай гьазурзавай продуктрал гуьзчивалдай федеральный государстводин “Техил” системада регистрация авун чарасуз я.
Оперативный штабдин заседанидал къейд авурвал, АПК рекъемламишунин федеральный программа уьмуьрдиз кечирмишунин сергьятра аваз хуьруьн майишатдин чилериз талукь сад тир федеральный делилрин къурулуш туькIуьрунин серенжемарни кьиле тухузва. Бязи районар и кардай хейлин гуьгъуьна амукьнава, бязибура лагьайтIа, анжах сифте камар къачун лазим я.
«Лезги газет»
