Чи ватанэгьли, медицинадин илимрин кандидат, Москвадин 115-нумрадин поликлиникадин духтур-уролог, Н.Семашкодин тIварцIихъ галай сагъламвилин Милли НИИ-дин илимдин чIехи къуллугъчи, мергьяматлувилин “Сагълам хуьр” проектдин автор, РФ-дин общественный палатадин яшайишдин проектрин вирироссиядин конкурсдин лауреат Загьир Хидирович Агъамов Москва шегьердин Хорошево-Мневники МО-дин депутатвиле (“Сад тир Россия” партиядай) хкянава.
З.Агъамован алакьунрикайни агалкьунрикай чна “Лезги газетда” идалай виликни кхьенай. Винидихъ тIвар кьунвай поликлиникада ада 2004-йисалай кIвалахзава. 2011-йисуз медицинадин илимрин кандидатвилин диссертация хвена. 2018-йисуз «Москвадин духтур» лагьай сейливилин дережадиз лайихлу хьана. 2020-йисуз ада кьилин кьвед лагьай образование къачуна — экономикадин кьилин школа акьалтIарна.
Уьлкведа коронавирусдин тIугъвал пайда хьайила, пешекар духтурди гуьгьуьллубурун жергедик кваз “яру зонада” зегьмет чIугуна. Алатай йисуз ам “Доброволец Москвы-2021” конкурсдани гъалиб хьана. Медицинадин рекье гьакъисагъ зегьмет чIугунай ганвай шабагьар, гьуьрметдин грамотаяр адахъ гзаф ава. “Сагълам хуьр” проектдин сергьятра аваз ада Москвадин духтуррин десте галаз Дагъустандин са жерге хуьрера пулсуздаказ агьалийрин сагъламвал ахтармишна, герекбуруз куьмекарни гана.
Ам халисан ватанпересвилинни инсанпересвилин чешне я. Гьар са рекье агалкьунар хьун алхишуналди, Загьир Хидировичаз чна депутатвилин дережа мубаракзава.
К. Ферзалиев
