Гьар йисан 6-июнь чи уьлкведа чIехи шаир, ватанперес, гуманист Александр Сергеевич Пушкинан шииратдин сувар ва гьакIни чIехи урус чIалан югъни яз къейдзава.
Шаирди вич са урусрин ваъ, вири россиявийрин (россиянрин) хва тирдакай гьеле вичел чан аламаз лагьанай:
Ваъ, тамамдиз рекьидач зун -закай жедай руьхъведал
Члаф тежер руьгь къарагъда, пак илгьамдив ацIана.
Шаиррикай тек сад кьванни аламай кьван дуьньядал
Зи машгьурвал — зи шаирвал давам жеда датIана…
И гафар къенин гьакъикъатдиз элкъвенва. Россиядин гьи пIипI, гьи халкь къачуртIани, А.С. Пушкин чпин шаир я лугьун тийир кас бажагьат гьалтда. Ада чи вири несилрин рикIера, вичи лагьайвал, “гъилив туькIуьриз тежер” гуьмбет хкажнава. Ам чIехи урус чIал ва а чIалал теснифнавай шаирдин ирс — хазина я.
Махачкъаладани 6-июндиз шегьердин общественностдин, яратмишдай интеллигенциядин векилар, студентар ва школьникар Республикадин шииратдин театрдин вилик, багъда хкажнавай чIехи устаддин гуьмбетдал цуьквер эцигиз, адан руьгьдиз икрамиз, шиирар кIелиз фена.
И ирс асирра давам жеда!
Авиляй зун зи халкьдин амукьда рикIе,
За манийра рахурна мерд михьи гьиссер.
Зи вагьши тир асирда азадвал еке
Тебрикна за хуьн патал мазлумрин кесер…
Мердали Жалилов
