Чи ватанэгьлияр — гьар сана
Хайи чилихъни чIалахъ, милли медениятдихъ рикI кузвай, гьакIни чпин кIвалахралди, пешекарвилинни алакьунрин вини дережадин ерийралди тафаватлу жезвай чешнелу ватанпересрикай чав гьар са пипIяй малуматар агакьзава. Жуьреба-жуьре йисара Москвада тIвар-ван авай тешкилатра жавабдар къуллугъар тамамарай, алай вахтунда вичин ватан тир КцIар шегьерда яшамиш жезвай Рустамов Самандар Арифан хва винидихъ къейднавай ерияр хас инсан я.
Ам 1984-йисан 19-июндиз КцIар шегьерда дидедиз хьана. Шегьердин 2-нумрадин мектеб хъсан къиметралди куьтягьна. 6-классда авайла, ада Туьркиядин лицейдик экечIун патал КцIар районда вичин таяр-туьшерин арада кьиле фейи имтигьанда 1-чка кьуна. Амма лицейда кIелдай ашкъи тахьайвиляй ада хайи мектебда чирвилер къачун давамарна.
Мектеб акьалтIарай жегьилди пеше хкягъунин жигьетдай яргъалди фикирнач — ам Москвадин илимдинни ахтармишунрин университетдик — экономикадин кьилин школадин менеджментвилин факультетдик экечIна. Чирвилер къачунихъ къаних жегьилди вичихъ тешкилатчивилин алакьунарни авайдакай гьа сад лагьай курсунилай раижна. Группадин юлдашрихъ галаз санал Самандар Рустамова курсуна кIелзавайбур патал сиясатдизни экономикадиз талукь а чIаван машгьур ток-шоуйрин тамашачияр яз иштиракдай мярекатар тешкилна.
“Эхь, чна са шумуд ток-шоуда иштиракна, амма гуьгъуьнлай за и кIвалах акъвазарна, гьикI хьи, анра рахазвай бязи ксарин ихтилатарни крар-гьерекатар сад муькуьдаз аксивалзавайбур яз акъатзавай. Бязибурун веревирдери уьлкведа кьиле физвай гьерекатриз гьич са кIусни хъсан патахъай хийир гузвачир”, — ихтилатзава С.Рустамова студент йисара акур крарикай.
Зегьметдин рехъ ада, эхиримжи курсуна кIелзавайла, Москвада “Делойт” тешкилатда (дуьньядин аудиторско-консалтинговый чIехи кьуд тешкилатдикай сад), консалтингдин департаментда персонал идара авунин хиле меслятчи яз кIвалахунилай гатIунна. “Делойтдилай” кьулухъ ада KPMG ва Россиядин ИТ-консалтингдин “Астерос” тешкилатда кIвалах давамар хъувуна. Муьштерийрин арада Россиядин нафтIадин лап чIехи тешкилатар, медицинадин хсуси клиникайрин сеть, инвестицийрин чIехи фондар ва масабур авай.
“Делойт” тешкилатда тежриба кIватIзавайди яз са тIимил вахтунда кIвалахай Самандар Рустамова вич еке гележег, пешедин рекьяй алакьунар ва, кьилинди, гьевесдивди кIвалахзавай пешекар тирди вад йисан муддатда успатна — “Астерос” тешкилатдин кьиле авайбуру адал проектрин регьбервилин жавабдар къуллугъ ихтибарна.
Са кьадар чIавалай ада бязи крар роботри тамамарунин технология кардик кутунин документар туькIуьрунин рекьяй Сбербанкдин инновацийрин технологийрин лабораторияда кIвалахна. Ихьтин жуьредин лабораторияр вири 11 кардик квай ва анриз анжах кьетIен алакьунарни кьатIунар авай пешекарар кьабулзавай. Самандар Арифовича ихтилатзавайвал, алай вахтунда Сберда и жуьредин технологияр кардик кутун Россияда, дуьньяда чIехи кIвалахрикай сад я. Банкунин къурулушда кIвалахай вахтунда ватанэгьлиди Европадин хейлин конференцийра метлеблу докладар гваз иштиракна. 2020-йисуз ада Прагада кьиле фейи конференциядал роботриз талукь технологияр кардик кутунин темадай авур доклад иллаки маналуди хьана.
Сбербанкда пуд йисуз зегьмет чIугурдалай кьулухъ ам ВТБ-да (Внешний торговый банк) правленидин векилрикай садан меслятчивилин къуллугъдал хъфена. Ина ада Сбербанкда кьилиз акъудай технологийрин дегишвилериз талукь гегьенш программа кадик кутунин жигьетдай регьбердиз куьмек гана.
Къуллугъдин гурарай виниз хкаж хьунихъ галаз сад хьиз, С.Рустамова хайи меденият хуьник, хайи халкьдин векилри гъиле кьазвай регьимдин крарик вичин пай кутуникай фикириз гатIунна.
“2017-йисуз зун мергьяматлувилин “ЛЕКИ” фонд тешкилай Гьасан Гьасановахъ ва маса стхайрихъ галаз таниш хьана. Гьа чIавалай инихъ за фондуни гъиле кьазвай крарик жувалай алакьдайвал къуьн кутаз эгечIна”, — лугьузва ада.
ВТБ-дай эхкъечIна, и мукьвара Самандар Рустамов Москвадай вичин ватандиз — КцIариз — хтана, хизандин карчивилиз цIийи дережадиз экъечIиз куьмек гузва. Кьилди къачуртIа, ада бубадизни стхадиз мижеяр гьазурунин хсуси производство еримлу ийиз куьмекзава. КцIара кардик квай “QiziI Qusar” карханади гьазурзавай мижеяр вирибуруз чизва, машгьур я.
Ватанэгьлидин хизанда кьве веледдиз тербия гузва. “Заз жуван аялар чи медениятдал, адетрал амал авуналди чIехи хьана кIанзава. Гьавиляй КцIариз хтун кутугай кар хьана — ина абуруз хайи чIални чир жеда”, — лугьузва веледар ватанпересвилинни инсанпересвилин руьгьдаллаз тербия гуникай фикирзавай кцIарвиди. Къуй адан рикIе авай вири мурадар кьилиз акъатрай!
К.Ферзалиев
