Медицинадин хилен работникрин хиве вири вахтара ва вири шартIара виридалайни жавабдар везифа ава: инсанрин сагъламвал хуьн ва мягькемарун. Гьавиляй гьахълудаказ лугьузва: медработникрин кIвалахдин гьар са югъ 24 сятиникай ибарат я. Эхиримжи йисара абурун къайгъуяр коронавирусдин тIугъвалди мадни артухарнава.
И йикъара чун ЦIийи Макьарин амбулаториядин работникрихъ ва абурун кIвалахдихъ галаз таниш хьана. Анин заведующийвиле 1993-йисуз Дагъустандин медицинадин госакадемия акьалтIарнавай Гьасанова Гуьлмира Камаловнади кIвалахзава.
— Амбулаториядин медработникри ЦIийи Макьарин ва Чуьхверхуьруьн агьалийриз медицинадин рекьяй къуллугъзава, — лугьузва Гуьлмира Гьасановади. — Кьве хуьре 5300-далай виниз агьалияр яшамиш жезва.
Амбулаторияда 21 касди кIвалахзава: терапевтди, сарарин духтурди, педиатрди ва медсестрайри. Виридахъ кьилин ва юкьван образование, гзаф йисарин кIвалахдин тежриба ава.
Амбулатория патал культурадин дараматдин сад лагьай мертебада са шумуд кIвал чара авунва. Дарискъалвал авач, медработникриз кIвалахдай кутугай шартIар тешкилнава.
Г. Гьасановади лагьайвал, коронавирусдин тIугъвал акъатай сифте йисара амбулаторияди къуллугъзавай кьве хуьре ковиддик ва стIалжемдик начагъбурун кьадар гзаф тир. ЦIийи Макьарин хуьр, азар акатнавайбурун кьадардал гьалтайла, районда кьвед лагьай чкадал алай.
— Эхиримжи варцара коронавирусди гзаф чкайра, гьа жергедай яз чи республикадани, кьил хкаж хъийизва, — давамарзава ихтилат Гуьлмира Камаловнади. — ТIугъвалдин лепе тамамдаказ къарагъдалди вилик чна чараяр аквазва, талукь кIвалах тухузва. Гьелелиг хуьрера ковиддик ва стIалжемдик инсанар начагъ хьайи дуьшуьшар авач. Бес кьадар рапарни хкана, чкадал ала.
Амбулатория рапаралди, инсанриз сифте куьмек гун патал лазим вири шейэралди таъмин я. Алатай йисуз амбулаториядиз тади куьмекдин махсус машин гана. Ида медработникриз хуьрера начагъбурун патав финин, герек хьайила, азарлу кас райондин центральный больницадиз агакьарунин карда куьмек гузва.
Гуьлмира Гьасановадин суьгьбетдай мадни малум хьайивал, хуьрерин агьалийрикай 1050 аялар я. Абурун сагъламвал хуьниз медработникри еке фикир гузва. Хуьрера юкьван кьве школа ва аялрин бахча кардик ква. Анрихъ кьилди медработникар галкIурнава.
Амбулатория зулунни хъуьтIуьн варцара кIвалахуниз тамамдаказ гьазур я. Дараматда пардалди чими ийидай къурулуш хъсан гьалда ава. Алатай йисуз цIийи пични эцигна.
— Чи амбулаториядин медработникри хиве авай жавабдарвал гьиссзава, кIвалахзава, — лугьузва Гуьлмира Гьасановади. — Виридалайни кьилин везифа — агьалийрин сагъламвилин къаравулда уяхдаказ акъвазун я. Медработникри, югъ-йиф талгьана, зегьмет чIугвазва.
Хазран Кьасумов
