Ингье гад акъатна, аялрин тIатIилар куьтягь хьана. Бязи школьникри аялрин лагерра ял яна, шегьерра яшамиш жезвай аялар хуьрериз бадейринни бубайрин патав хъфена. Абуруз хуьруьн аялрихъ галаз чпиз чин тийизвай лезги чIалан гафар чир хьана, тухдалди емишар ва салан майваяр тIуьна, куьчейра ва багълара катиз-калтугиз къугъвана, чпин сагъламвал мягькемарна.
Дербент райондин школаяр цIийи кIелунин йисаз хъсан гьазур хьана. 1-сентябрдиз райондин кьил Мавсум Рагьимова, РД-дин туризмдин, халкьарин художественный сеняткарвилерин рекьяй министр Эмин Мерданова ва райондин образованидин управленидин начальник Сона Гьажибеговади Чинар хуьре цIийиз туькIуьр хъувунвай, М.Гусаеван тIварунихъ галай 2-нумрадин школа ачухунин шад мярекатда иштиракна.
Школа тамамдиз цIийи хъхьанва. Дараматда чимивилерин, экверин, цин линияр цIийибуралди эвезнава. Школадин вилик патан акунар, куьгьне полар, кабинетрин цлар, дегьлизар вири цIийи хъувунва. ЦIийи ракIарар, дакIарар кутунва. Хъсандиз кIвалах вилик тухун патал классар, кабинетар къулай мебелдалди, гьакIни алай аямда лазим къвезвай тадаракралди тагьминарнава.
Кьиле тухванвай кIвалахрин еридилай рази яз амукьай Мавсум Рагьимова аялризни муаллимриз кIелунин йис мубаракна, школа цIийи хъийиз кIвалахар авур эцигунардайбуруз сагърай лагьана.
Аялризни муаллимриз тебрикдин гафар Э.Мерданова ва С.Гьажибеговадини лагьана.
Алай йисуз Дербент районда пуд школа цIийикIа туькIуьр хъувунва. Шад мярекатар гьакIни Белиж хуьруьн ва Белиж поселокдин цIийикIа туькIуьр хъувунвай 2-нумрадин школайрани кьиле фена.
Къагьриман Ибрагьимов
