СтIал Сулейманан районда, рагьметлу Ажадулагь Жарулаеван экуь къаматдиз бахшна, футболдай мукьвара акьалтIай республикадин XXII турнирда Мегьарамдхуьруьн райондин “Ярагъ” командади 3:2 гьисабдалди гъалибвал къазанмишна. “Дербент” ва “Куьре” командайри, талукь тирвал, 2 ва 3-чкаяр кьуна.
КIвенкIвечи чкаяр кьур командайриз Агъа СтIалрин хуьруьн кьил Надир Эфендиева, спорткомитетдин директор Чингиз Абдулмежидова, райондин собранидин депутат Максим Аскерова, хуьруьн мискIиндин имам Талиб Бейбалаева, Жарулаеврин хизандин векилри кубокар, медалар, пулдин пишкешар ва грамотаяр гана.
* * *
А.Жарулаеван экуь къаматдиз бахшнавай турнирдин нетижаяр кьадай юкъуз Агъа СтIалдал боксдайни турнир тешкилнавай.
Махачкъаладай, Дербентдай ва маса шегьеррайни районрай атанвай 100-дав агакьна спортсменри заланвилин 20 категориядай кьиле тухвай бягьсера чпин устадвал къалурна. Райондин ДЮСШ-да тренерар тир Р.Нагъиеван ва И.Айдиеван гъилик вердишвилер къачузвай спортсменри акъажунра агалкьунар къазанмишна. КIвенкIвечи чкаяр кьур боксерриз кубокар, медалар ва грамотаяр гана.
Хазран Кьасумов
