Гьар йисан 3-сентябрдиз чи уьлкведа терроризмдиз акси женгина рейсадвилин югъ къейдзава. Ам 2004-йисан 1-3 сентябрдиз Кеферпатан Осетиядин Беслан шегьерда вагьшивилелди теракт кьилиз акъудуникди 300-далай виниз инсанар кьиникьихъ галаз алакъалу яз 2005-йисан июлдиз тестикьарнай. Адалай инихъ и юкъуз чи уьлкведа, республикада жуьреба-жуьре мярекатар кьиле тухун адетдиз элкъвенва. СтIал Сулейманан райондин пресс-къуллугъди хабар гузвайвал, 3-сентябрдиз, райондин центральный библиотека кьиле аваз, хуьрерин саки вири филиалрани террордиз акси мярекатар кьиле тухвана…
Кьилди къачуртIа, Зизикрин хуьруьн библиотекада, инсанрин рикIериз еке таъсир, тIарвал гайи Бесландин вакъиадиз талукьарна, “Бесландин тIал — Россиядин тIал” лишандик кваз мярекат тешкилнавай.
— ЦIемуьжуьд йис идалай вилик Бесланда шаддиз, гъилера цуьквер аваз школадиз фейи аялрин, абурун диде-бубайрин, муаллимрин кьилел боевикри рикIелай тефидай мусибат акъудна. Пуд юкъузни йифиз аялар цихъ гьарарат яз ва гишила туна. Терактдин нетижада 300-далай виниз инсанар телеф хьана. Абурукай 180 аялар тир. Бязи аялар сифте школадиз атана, партадихъ ацукьиз, къимет къачузни агакьнавачир, — рикIел хкана мярекат ачухай библиотекадин директор Гуьлше Мегьамедовади. Терроризм негьзавай, адан вилик пад кьуниз талукьарнавай суьгьбетдилай гуьгъуьниз хуьруьн юкьван мектебда чирвилер къачузвай аялри хайи ва урус чIаларал шиирар кIелна.
Важиблу темадиз талукьарна, райондин ЦБС-дин Уллу-Гъетягърин, Алкьвадрин, Испикрин, Алидхуьруьн, Чуьхверхуьруьн филиалра кьиле тухвай мярекатрал жаванар терроризмдин, адан макьсаддин гъавурда туна. КIватI хьанвайбур и темадай ктабрин выставкайрихъ галазни танишарна.
И юкъуз Агъа СтIалдал тешкилай “Чаз ислягьдаказ яшамиш жез кIанзава” мярекатдиз хуьруьн агьалийриз, мектебда кIелзавай аялриз ва муаллимриз, аялрин бахчада тербия къачузвай бицIекриз ва полициядин участковый уполномоченный Башир Мегьамедоваз эвернавай. “Терроризмдиз — ваъ!” лишандик кваз тукIуьрнавай плакатдилай, “Терроризм — алай аямдин къурхулувал” ктабрин выставкадилай, гьакI цуькверивди, шемеривди ва аялар къугъвадай затIаривди безетмишнавай рикIел хуьнин пипIелай эгечIна, терроризмдиз акси суьгьбетрал къведалди хъсан тешкиллувал аваз кьиле фейи мярекат макьсаддив агакьна. Ам са декьикьада вири кисна акъвазуналди акьалтIна.
Полициядин участковый уполномоченный Славик Сагьидован иштираквал аваз Курхуьруьн библиотекада кьиле фейи мярекатни итижлуди хьана.
НуьцIуьгърин библиотекада хуьруьн юкьван мектебдин аялрин иштираквални аваз “Жуванбур маса гудач” мярекат Россиядин Игит Зейнудин Батманован экуь къаматдиз бахшнавай.
ЦIийи Макьарин хуьруьн библиотекада тешкилай мярекатдиз хуьруьн администрациядин кьил Асамудин Къазиагьмедоваз, отставкада авай полковник Масуб Магьмудоваз, мектебда кIелзавай аялриз ва муаллимриз теклифнавай. “Россия террордиз акси я” лишандик кваз тешкилнавай ктабрин выставка, террор негьзавай, лянетламишзавай суьгьбетарни итижлубур, акьалтзавай несилдивай тарс хкудиз жедайбур тир.
“Къуй дуьньяда терактар мад садрани тахьурай!” — виринра мярекатар ихьтин келимадалди акьалтIна.
Рагнеда Рамалданова
