Краснодардин крайдин Новороссийск ше­гьерда кардик квай лезгийрин милли медениятдин чкадин автономиядин “Леки” командади физкультурникдин йикъаз талукь яз шегьерда милли жемиятрин, тешкилатрин арада мини-футболдай кьиле фейи акъажунра 2-чка кьуна.

Милли медениятдин тешкилатдин кьил Адилхан Къагьриманова ихтилат авурвал, футболдай къизгъиндаказ кьиле фейи акъа­жунра лезгийрин, осетинрин, немсерин, эрменийрин, славянрин, узбекрин, грекрин милли тешкилатрин кьилдин командайри чпин алакьунар къалурна. ЦIийиз ара­дал гъанвай “Леки” командади 2-чка кьун, шак алачиз, лезги футболистрихъ хъсан гележег авайдакай хабар гузвай­ кар я.

“Гележегда Новороссийскда милли тешкилатрин выставкаярни тешкилдайвал я. Арадал гъанвай тешкилат жегьилди хьуниз килигна, чахъ гьелелиг лезгийрин милли яржар, ивирар, адетар къалурзавай за­тIар, экспонатар (месела, куьгьне кварар, гетIеяр, парталар, гамар, газетар, ктабар…) авач. И карда чаз куьмекар гудайбур хьа­найтIа, хъсан жедай”, — алава хъувуна А.Къагьриманова.

Куругъли  КIелетви