6-сентябрдиз РагъэкъечIдай патан экономикадин форумдин (ВЭФ) сергьятра аваз РФ-дин Президент Владимир Путинан регьбервилик кваз алай аямдин шартIара туриствилин милли индустрия еримлу авунин месэлайрай Государстводин Советдин Президиумдин гегьенш заседание кьиле фена. Ана РД-дин Кьил Сергей Меликовани иштиракна.
Уьлкведин Президентди гьар жуьредин къазанжияр къачузвай агьалийриз сиягьат ийидай, сагъламвал мягькемардай, курортриз ва ял ядай маса чкайриз фидай гегьенш мумкинвилер хьун патал чарасуз вири крар авун герек тирдакай лагьана. Адан гафаралди, къенепатан туризм еримлу авун патал Россиядихъ зурба мумкинвилер, гьар са региондихъ надирвилер ава.
Сергей Меликова Telegram-каналда хабар гайивал, Владимир Путина вичин рахунрин гьа сифте декьикьайра Дагъустандикай ихтилат кудна ва “Къаякент” курортдин зонадал чан хкунин мумкинвилериз еке къимет гана.
“Заз республика патал важиблу месэлайрикай рахадай мумкинвал хьана. Эвелни-эвел, гьелбетда, инфраструктура еримлу авуникай. Алай вахтунда туриствилин мулкарин пуд мастер-план туькIуьрунин кIвалах кьиле физва…”, — кхьенва С.Меликован Telegram-каналда.
С.Меликова уьлкведин Президентдиз цIийи курортдин проектни раижна. Къейдзавайвал, курортдихъ международный метлеб жеда.
В.Путина Каспий гьуьлуьн къерехда курортдин зона арадал хкунин теклифдин тереф хвена.
“Кеферпатан Кавказда туриствилин комплексар еримлу авун давамарна кIанда, гьа жергедай яз къенин девирдин дережада аваз Каспийдин курортдин “Къаякент” зонадал чан хкун герек я. Советрин вахтара и курорт уьлкведин лап хъсанбурукай сад тир”, — лагьана Владимир Путина.
«Лезги газет»
