Уружбайрин хуьре цIийи мектеб ачухна
Им Мегьарамдхуьруьн райондин Уружбайрин жемятди фадлай гуьзлемишзавай югъ тир. 1-сентябрдиз юкьван мектебдин цIийи, гуьрчег, кьве мертебадин дараматдин ракIарар ачухна. И вакъиадиз талукь яз Чирвилерин юкъуз суварин къайдада безетмишнавай школадин гьаятда шадвилин мярекат кьиле фена. Ана Дагъустандин Гьукуматдин Председателдин заместитель Рамазан Жафарова иштиракна.
ЦIийи мектебдин гьаятда кIватI хьанвайбур гегьенш экрандилай къалурзавай РФ-дин Гьукуматдин Председателдин заместитель Татьяна Голиковадин ва просвещенидин министр Сергей Кравцован видеообращенийриз тамашна.
Сувар РФ-дин ва РД-дин пайдахар хкажуналди ва гимнар ягъуналди башламиш хьана. Мярекат школадин директор Рабия Къагьримановади ачухна. Ада аялриз, муаллимриз, диде-бубайриз ва хуьруьн вири жемятдиз цIийи школа ачухун мубаракна, Россиядин Президент Владимир Путиназ, Дагъустандин регьбер Сергей Меликоваз, райондин кьил Фарид Агьмедоваз акьалтзавай несилдин патахъай къайгъударвал авунай, мектебдин дарамат эцигай устIарриз ва фялейриз намуслувилелди зегьмет чIугунай рикIин сидкьидай чухсагъул лагьана.
Гаф райондин кьил Фарид Агьмедоваз гана.
— Къе чи уьлкведа къейдзавай Чирвилерин югъ, кIелунин цIийи йис чун патал а кардалди метлеблу я хьи, чи районда Уружбадал хуьруьнвийри фадлай гуьзлемишзавай цIийи школа ачухзава. Им Россиядин Президентди чи уьлкведин школайра кьвед ва пуд лагьай сменаяр тахьунин месэла вилик эцигайвиляй хьанвайди я.
Чи республикадин регьберди алай йис Дагъустанда образованидинди яз малумарнава. Им акI лагьай чIал я хьи, образованидин цIийи объектар эцигунин, куьгьне школаяр капитальнидаказ ремонтунин, чирвилер гунин ери хъсанарунин месэлаяр республикадин руководстводин кIвалахда эвелимжибур жеда.
ЦIийи школа эцигунай, — давамарна Ф.Агьмедова, — чи регион комплекснидаказ вири рекьерай вилик тухунин месэлаяр гьялунин карда ийизвай чалишмишвилерай республикадин Кьил Сергей Алимович Меликоваз чна сагърай лугьузва.
Райондин регьберди школа эцигунин кардик чпин пай кутур виридаз чухсагъул лагьана, цIийи мектебдикай аялриз кьвед лагьай кIвал жедайди къейдна.
Муаллимриз, школада кIелзавай аялриз ва абурун диде-бубайриз цIийи школа ачухун, кIелунин цIийи йис башламиш хьун рикIин сидкьидай мубарак авуналди, Фарид Агьмедова лагьана:
— Къуй и школа акьалтIарзавайбуру гележегдин агалкьунралди хайи школа ва вири район баркалладалди машгьур авурай!
Ада школадиз вичин патай савкьат гана.
Тебрикдин гаф гурлу капар ягъуналди къаршиламишай РД-дин Гьукуматдин Председателдин заместитель Рамазан Жафароваз гана.
— Гьуьрмету муаллимар, играми аялар, за квез Дагъустан Республикадин Кьил Сергей Меликован, Гьукуматдин Председатель Абдулмуслим Абдулмуслимован тIварарихъай цIийи школа, кIелунин йис рикIин сидкьидай мубаракзава.
Къе республикада ихьтин кьуд школа ишлемишиз вахкузва: Хасавюрт районда — кьвед, Ахцегь районда — сад, Мегьарамдхуьруьн районда Уружбайринди. И школа, играми аялар, куьн паталди, куьне дерин чирвилер къачун, муаллимриз кIвалахдай къулай шартIар хьун паталди эцигнавайди я.
Заз куьн инанмишариз кIанзава, — давамарна Рамазан Жафаровича, — алай вахтунда республикадин Кьили аялрин гьакъиндай къайгъударвилиз ва муаллимриз къулай шартIар яратмишуниз еке фикир гузва.
ЦIийи школа, кIелунин йис вичин патай аялриз ва муаллимриз мубарак авуналди, Р. Жафарова абурухъ мягькем сагъламвал, кIелунра ва кIвалахда еке агалкьунар хьана кIанзавайди лагьана ва республикадин регьбердин патай школадиз савкьат вугана.
Тебрикрилай гуьгъуьниз, школа ачухунин лишан яз, яру лент атIана. Мугьманар алай аямдин къайдада тадаракламишнавай кабинетриз, школьникриз яратмишнавай шартIариз, гьаятар аваданламишнавай гьалдиз тамашна. Гьакъикъатдани, им алай аямдин мектеб я. Дараматдикай хуьруьн акунар мадни гуьзеларзавай имарат хьанва.
Абдулафис Исмаилов
