“Лезги газетдин” алай йисан 33-нумрадиз Ахцегьрин райсобранидин председатель Абдулкерим Палчаева чкадин журналистрихъ галаз кьиле тухвай гуьруьшдикай макъала акъатна.

Жегьилар патарихъ финиз талукь суал гайила, А.Палчаева Ахцегьа бейкарвилин жигьетдай авай гьалариз гьакъикъи жаваб гана: “…Чаз гзаф бегьер гудай багълар кутаз кIанзава. Хъсан агрономарни багъманчияр герекзава. Зегьметдин чкайрикай рахайтIа, чаз районда кар алакьдай слесаррин, сварщикрин, трактористрин, эцигунардай устIаррин, фялейрин, чубанрин, нехирбанрин, юристринни экономистрин, журналистрин игьтияж ава. КIвалахдай кас авач…”.

Икьван пешекаррин, кардал маш­гъул жедайбурун муьгьтежвал авай чкада бейкарвал ава лугьуз жедани?! Дагълух маса хуьрерив ге­къи­гайла, Ахцегь мублагьвал авай, гьавадин жигьетдайни хъсан чка я. Ми­сал яз, цIи ана булдалди маш­маш­рин бе­гьер хьана. “Жедачирни абурувай (агьалийривай — авт.) а емишрикай зурар ийиз, маса га­най­тIа?” — гьахълудаказ лугьузва А.Палчаева.

Зун гьеле Дагъустандин, гьа жер­­гедай яз чи дагълух хуьрерин мектебра муаллимар, кьилди къа­чур­тIа, асул гьисабдай химикар, фи­зи­кар, математикар бес тахьуникай рахазвач. Инал суал къвезва: муал­лимарни, винидихъ къалурнавай кьван кеспиярни кьилиз акъуд­дай ксар амачирла, ахьтин хуьрера сифте­ нубатда гьихьтин месэлайриз фикир гун герек я? Ихьтин макъамра­ сифте нубатда районрин вилик-кьилик квайбуру фагьум-фикирна кIан­да.

Шак алачиз, районра, хуьрера неинки аялрин бахчаярни мектебар, спортзаларни паркар, гьакI агьалийри зегьмет чIугвадай карханаярни, яни са квел ятIани машгъул жедай мумкинвилерни, къулайвилерни, дигидай ва хъвадай целди таъминвални хьун лазим я. Хуьрер “чан аламайбур” яз амукьун патал вири хилерай комплекснидаказ крар кьилиз акъудна кIанзава. МасакIа анра инсанар акъвазариз жедач.

Гьар са хуьруьхъ вичин кье­тIен­вал ава ва агьалийрин дуланажагъни гьа кьетIенвилелай аслу жезва. Бязи чкайра магьсулар хъсандиз битмиш жеда, масанра афнияр, по­мидорар, келемар, картуфар… Хуьруьн майишатдин гьи хел къ­а­чур­тIани, зегьметкешриз герек тир куьмекар гун гьамиша важиблу ва чарасуз я. И жигьетдай чи ерийра тIал алай месэла яз амукьзавайди дигидай цин кьитвал хьун я. Гьатта па­тавай кIамар, вацIар физвай хуьрерни, яни цин кьитвал авачиз, адалди таъминариз жезвач. Гьавиляй артухлама гьелек жезвай зегьметкешар, чпин салар-багълар гадарна, кьил хуьз жедай чкайриз катзава.

“Дуьнья дегиш хьанва” лугьудай ванер галукьда мукьвал-мукьвал чи япарихъ. Дуьнья бажагьат дегиш хьанва, тIебиат гьа тIебиат я. Мумкинвилерикай рахайтIа, абур генани артух хьанва. Амайбур гьа­кIан ихтилатар я.

К.Ферзалиев