Зун и йикъара уф туналди ядай  музалатрин хъсан сеняткар, музыкадин муаллим Артур Гьа­жиевал кьил чlуг­ваз фенвай. Кlва­лиз гьахьайла, дах Шихрагьим НетIи­фовичал кьил чlуг­ваз, Россиядин Армиядин жергейра къуллугъзавай офицерар — Тимур, Эльмур ва Эльдар­ отпускдиз­ хтанваз хьана. Зун абурухъ галаз таниш хьана ва суьгьбетарна.

Ахцегь райондин Хъуьлерин хуьряй тир Ватандин Чlехи дяведин ветеран, инвалид Нетlиф Гьажиев  дагълух хуьрер дуьзендиз куьчарзавай 1950-йисуз кайвани Гуьлуьмни галаз Хасавюрт райондин Бамматюрт хуьруьз куьч хьана. Ина абуруз са хва жезва, адал  Шихрагьим  тIвар эцигзава.

Чеченар яшамиш жезвай  патал хуьруь дад ганач. Абурун рикlи хайи ерийрихъ ялзавай. Эхирни хизан Белиж поселокдиз хквезва. Йисар къвез алатна. 1976-йисуз Шихрагьим Гьажиев гиливи Назлуханумал эвленмиш жезва. Назлуханума Шихрагьимаз вад велед ба­гъиш­за­ва. Кьуд хвани са руш кlва­чел акьал­­­­дарун патал Шихрагьима сифте поч­тадин идарада, ахпа “Дагестангазсервис” ООО-дин Лукlва­рин участокда устlар яз, рагьметлу Наз­луха­нума сифте “Белиджинский” сов­хоз­да, ахпа Абас Исрафилован тIвару­нихъ галай агрофирмадин культурадин кlвалин художественный руководитель яз зегьмет чlугуна.

Шихрагьиман чlехи гада Артур 1977-йисуз дидедиз хьана. Дер­бент­дин музыкадин училище акьалтlа­райдалай кьулухъ ада гьуьлуьн сергьятрин кьушунра къуллугъна. Гуржистандинни Абхазиядин арада яракьлу чуьруьк кьиле физвай йисара Артураз ана иштиракун кьисмет хьана. Алай вахтунда ада музыкадин муаллимвиле Белиждин Г.Лезгинцеван тlвару­нихъ галай школада кlвалахзава. Ам хъсан сеняткарни я. Вичин дестедихъ галаз ме­хъеррик-мелерик иштиракзава.

Тимур  Гьажиев 1979-йисуз дидедиз хьана. Белиждин 8-нумрадин СПТУ акьалтlарайла, 1998-йисуз армиядин жергейриз фена. Ам Псков об­ластдин гвардиядин 25-мотост­релковый бригададиз акъатна. Муьжуьд вацра дяведин алай аямдин тех­ника чирай аскер Ладожский вирин патарив лишанар ягъиз тухвана. Лишанар кьазвай яракьар лап ба­гьа­бур хьуниз килигна, абуруз зениткадай садра ядай ихтияр гузвай. Тимур­­ Гьажиева вичин ихтиярда вугай раке­тадалди цавай физвай лишан яна ва хъсан къимет къачузва. Ахпа ам “Ке­ферпад” тlвар алай махсус дестедик­ кваз Чечнядиз акъатна. А вахтунда адан командирди взводдиз нубатдин тапшуругъ ганвай. Са гъвечlи­ хуьруьз агакьайла, абурал боевикри гьужумна. Бейхабардиз гьужум аву­низ килигна, командирдал, адан заместителдал ва шофердал залан хирер хьана. И арада вич-вичикай квахь та­вур старший сержант Тимура­ командирдин везифаяр вичел къачузва. Хирер хьанвайбур дал­­дадик акъуд­на, бандитрихъ галаз женг давамарна. Взводда авай ругуд­ кас телеф хьа­натlани, абуру бандитар катуниз мажбурна. Секин хьайила, ада ва ас­керри хирер хьайибур частуниз хкана. И женгинай ва гьакlни ма­са кьегьалвилерай, Ватандин вилик хи­ве авай пак буржи намуслу­вилелди тамамарунай гвардиядин стар­ший сержант Тимур Гьажиев “Викlегь­ви­лин” ордендиз ва “Дирибашвиляй” медалдиз лайихлу хьана. 2000-йисуз ва адалай гуьгъуьнизни аскердин­ диде-бубадин тlварцlел ада къул­лугъ­за­вай кьушунрин командованидин патай чухсагъулдин чарар хта­най.­

Армиядилай гуьгъуьниз Тимур РФ-дин оборонадин министерстводин Санкт-Петербургда авай военный инженерно-технический университетдик экечlна. Москвада Генеральный штабда кlвалахна. 2008-йисуз Тимур Гьажиев “Яракьлу гьерекатрин ветеран”, 2011-йисуз “РФ-дин яракьлу къуватра 10 йисан девирда намуслувилелди къуллугъ авунай”, “Женгера лайихлувилерай”, “Армиядин генерал Комаровский” медалриз лайихлу хьана.

Эльмур 1982-йисуз Белиж поселокда дидедиз хьана. 1997-йисуз поселокдин 3-нумрадин школада       9-класс акьал­тlарна. 10-11-классра Белиждин гим­назияда кlелна. 1999-йисуз Дербентдин хуьруьн майи­шатдин­ техникумдиз гьахьна.Анаг акьал­т­lарай 2001-йисуз адаз Россиядин Армия­дин жергейра къуллугъ ийиз эверзава. Кьве йисуз къулллугъ авурдалай кьулухъ, чlехи стхайрилай чешне къачуна, ам, оборонадин ми­нистерстводихъ галаз икьрар ку­тlунна, армияда шофервиле акъваззава. Са йисалай младший сержант Эльмур Гьажиев ВАИ-дин инспекторвиле эцигзава. Алай вахтунда прапорщик Эльмур Гьа­жи­е­ва­ Грозный шегьерда къуллугъзава. Военный инспектор яз, адан хи­ве­ военный колонайрихъ галаз Украинадин сергьятдал кьван фин ава. Ам хейлин грамотайрин, лишанлу знакрин ва  медалрин сагьиб я.

Гъвечlи хва Эльдар 1986-йисуз дидедиз хьана. Кьетlен зигьин  аваз акуна, вад йис тамам хьайила, ам 1-классдиз ракъурна. Поселокдин пуд лагьай нумрадин школада хъсан къи­метралди 9-класс акьалтlарна,  ада Белиждин гимназияда кlелун да­вамарна. 2003-йисуз 11-класс куьтягьай жаван Санкт-Петербургдин военно-инженерный технический университетдиз гьахьна. Анаг хъсан къиметралди акьал­тlарай лейте­нант­диз университетдин ректоратди вузда муаллимвиле кlвалахун теклифна. Зегьметдин рехъ муаллимвилелай гатlунай адаз 2010-йисуз старший лейте­нант­дин чин гузва. 2011-йисуз ам вузда курсунин начальниквиле тайинарзава.  2012-йисан эхирра Эльдар Шихрагьимович РФ-дин оборонадин ва МВД-дин къенепатан кьушунрин министррин кьве приказдалди Воронеж шегьерда авай къенепатан кьушунрин кьилин управленидин полкунин начальникдин куьмекчивиле ракъурзава. Ирид вацралай ам полкунин къуллугъдин начальниквиле тестикьарзава. Вад йисан къене къуллугъдинни женгинин везифаяр леке квачиз тамамарунай ам округдин ва бригададин командиррин шабагьриз лайихлу хьана. 2017-йисуз адаз майордин чин гана.

И йисан декабрдин вацра Эльдар Центральный Федеральный округда авай Росгвардиядин кьетIен къуллугъдин  начальникдин заместителвиле тайинарзава. Ахпа ада Центральный Федеральный округда авай Росгвардиядин управленида отделдин начальникдин везифаяр тамамарна. ЦIи ам РФ-дин Росгвардиядин федеральный къуллугъдин директор В.В.Золотован къарардалди и къуллугъдин отделдин начальниквиле тайинарна. Июндиз адаз подполковникдин чин гана.

Кьилдин лайихлувилерай, чалишмишвилерай, хъсандиз къуллугъ авунай ва къуллугъдинни женгинин кlвалахда еке дережаяр къалурунай ам Россиядин милли гвардиядин кьушунрин командующий В.Золотован ва РФ-дин кьушунрин милли гвардиядин Центральный округдин командующийдин везифаяр тамамарзавай С.Бойкодин къулар алай са шумуд шабагьрин сагьиб я.

Вири стхаяр чешнелу  хизанрин иесияр я. Абурун уьмуьрдин юлдашри Шихрагьим бубадиз муьжуьд хтул пишкешнава.

Дуьзвал, гьахъвал кlандай, къас­тунал кlеви, чарадаз писвал тийиз, герекдаз куьмек гуз вердишарнавай стхайри — Гьажиеври Ватандиз къуллугъ авунин пешеяр хкя­гъун­ дуь­шуьш­дин кар туш. Абуру чпин чlехи бубайрилай чешне къачузва.

Донецкдин ва Луганскдин республикаяр азад авун патал махсус во­енный серенжем кьиле физвай вахтунда, Россиядин Армиядин жергейра къуллугъ ийиз, чи къенин ва пакадин йикъан ислягьвал ва саламатвал хуьз, къаравулда акъвазнавай стхайриз-Гьажиевриз баркалла! Къуй абурухъ анжах гъалибвилер хьурай!

Къагьриман Ибрагьимов