ЦIийи ктабар
Агъа СтIалрин хуьруьз гьахълудаказ “Шииратдин Мекка” лугьузва. Гьакъикъатдани, чIехи ва баркаллу тарих авай и хуьряй шаирар гзаф акъатна: ХХ асирдин Гомер, Дагъустандин халкьдин шаир СтIал Сулейман, СтIал Мусаиб, СтIал Саяд, СтIал Мислимат, Балакъардаш Султанов, Сажидин Саидгьасанов, Рамазан Нагъиев, Фейзудин Нагъиев, Соня Ибрамхалилова, Рамазан Дадашев, Намрудин Аюбов… Мукьвара абурал Далгат Муртазаевни алава хъхьана. И йикъара Кьасумхуьрел кардик квай “Куьредин ярар” культурадин центрада “Латар булах” тIвар алаз адан сад лагьай ктаб акъатна. АгъастIалви лежбер Жаватан хва Д.Муртазаева вичиз “СтIал Далгат” тахаллусни къачунва.
“Латар булах” ктаб 160 чиникай ибарат я. Ана 975 бендиникай ибарат тир 140 шиир гьатнава. Зун СтIал Далгатан яратмишунрихъ галаз хъсандиз таниш я. За адан ктабдиз редакторвални авуна. Ктабда машгьур районэгьлийриз, вичин багърийриз бахшнавай, гьакIни насигьатдин шиирар гзаф ава.
Куьруь къейд.
Далгат Муртазаев (СтIал Далгат) 1951-йисуз Агъа СтIалдал дидедиз хьана. Ада хайи хуьре юкьван школа, ДГУ-дин физический факультет, Дагъустандин политехнический техникум ва Москвада Разумовскийдин тIварунихъ галай институтдин инженерно-экономический факультет акьалтIарна, жуьреба-жуьре чкайра кIвалахна.
“Латар булах” ктаб чапдай акъатун мубарак авуналди, чаз СтIал Далгатахъ мягькем сагъламвал, яратмишунрин рекье мадни агалкьунар хьана кIанзава.
Хазран Кьасумов
