И йикъара Ахцегь райондин общественный майишатра зулун магьсулрин бегьер кIватI хъувуна. Зулун тумар цайи 505 гектардай ина 751 тонн техил  къачуна, яни гьар са гектардай юкьван гьисабдалди — 13,8 центнер. Бегьер гьиниз ийизва лагьайтIа, зулухъ цадай тум хкяна, амайди базардин къиметрай муьштерийриз маса гузва.

505 гектардай 751 тонн техил гзаф яни, тIимил? Цик квачир­ чи­лер я, миянардай шейэр, зиянлу гьашаратрихъни эчIел­рихъ­ галаз женг чIугвазвай дарманар ишлемиш тийизвай, яни агротехникадин чарасуз серенжемрал амализ тежезвай, материалринни алатрин база гзаф зайиф тир (куьгьне­ техника­ мукьвал-мукьвал къайдадай акъатзава, ам туь­кIуьр хъийидай устIарарни устIарханаяр авач) шартIара им пис нетижа туш.

Районда магьсулдарвилел анжах кьуд-вад майишат маш­гъул я: СПК “Луткунский” (председатель Рамиз Сулейма­нов, 160 гектар чил цана, гьар са гектардай 17,5 центнер бегьер­ къачуна), СПК “Самурви” (председатель Демир Къадимов­, 150 га. цана, гьар са гектардай — 18,5 центнер), СПК “Хрюгский” (председатель Девришбег Девришбегов, цайи 150 гектар­дин майданрай гьар жуьре себебрикди бегьер къачуз хьанач)­ ва Хинерин хуьруьн ИП “Сурхаев” (Бабаюрт районда арендада кьунвай 90 гектардин гьар са гадай 22 центнер бегьер къачуна). Авайвал лагьайтIа, районда 1000 гектардилай артух майданра зулун магьсулрин тумар цадай мумкинвал ава.

— Гьакъикъатда чна магьсулдарвиле РД-дин чилерин ва эменнидин алакъайрин рекьяй министерстводин ихтиярда авай куьчери хипехъанвилин чилер ишлемишзава. Райондин УСХ-дин идарадин везифа анжах меслятар къалурунал сергьятламиш жезва. Закондалди чаз, гьатта райондин ад­ми­нистра­циядин къуллугъчийризни кваз майишатдин крарик къаришмиш жедай ихтиярар авач, — лугьузва “Ахцегь район” муниципалитетдин хуьруьн майишатдин управленидин  начальник Арген Гьажиева.

Къейд ийин, зулун магьсулрин бегьер кIватI хъувунихъ галаз санал  районда малдарри алафарни гьазурзава. Герек тир 25 агъзур тонндин чкадал гьелелиг 21740 тонн векъи ала­фар­ кIватIнава, адакай 740 тонн — самар. Алафар кIватIунин кIва­лах — кьвед лагьай сеферда векьер ягъун гьеле давам жезва. Гьа са вахтунда, къейд тавуна жедач, куьлуь карч алай гьайванар патал къишлахрал, мублагьди хьайи шазан йисалай амукьнавайбур гьисаба кьун тавуртIа, алафар гьазур­ туш. Адет тирвал, хипехъанар чпин гьайванар куьчар хъувур­далай кьулухъ и месэладин къайгъуда жеда, яни чарасуз кьадар векъи ва кфетлу алафар маса къачуда.

Дашдемир Шерифалиев