Сулейман-Стальский райондин кьил Нариман Абдулмуталибов Цмуррин хуьруьз фена ва инвестор, мергьяматлувилин “Хуьр” фондунин тешкилатчи (учредитель) Марат Шайдаевахъ галаз гуьруьшмиш хьана. Гуьруьшда райондин администрациядин кьилин заместитель Лацис Оружева ва  Цмуррин хуьруьн администрациядин кьил Раида Алибеговади иштиракна.

Мярекатдал хуьруьн яшайишдинни экономикадин месэлаяр веревирдна, гуьгъуьнлай абур инвестмайдандал фена.

Нариман Абдулмуталибов, Марат Шай­да­­ев ва жавабдар маса юлдашар сифте Цмур­рин юкьван школада кIелунинни тербия­дин кIвалах гьикI тешкилнаватIа, анаг гьикI таъмин ятIа  килигна, муаллимар патал эцигзавай 9 квартирадин яшайишдин кIвалерин, школьникриз токарвилин, дерзичивилин, кIарас гьялдай пешекарвилер чирдай мастерскойрин объектрал эцигунрин кIвалахар кьиле тухузвай гьалдихъ галаз таниш хьана.

Цмурдал алай аямдин тадаракралди таъмин тир, 120 аялдиз чкаяр авай кьве мертебадин школадин дарамат кардик кваз кьвед лагьай йис я. Ам эцигуник ва тадаракламишуник “Хуьр” фондунини еке пай кутуна­.

2018-йисан 1-сентябрдалди ина муаллимар патал 4 мертебадин кIвалер, цехар ва маса объектарни эцигна, футболдин майдан туькIуьрна акьалтIарда.

Алай вахтунда Цмуррин школади Да­гъус­тандин государстводин аграрный университетдин Аграрно-экономический техникумдихъ га­лаз кIелзавайбуруз пешекарвилин чирв­илер гунин рекьяй сих алакъа хуьзва. Школа куьтягьзавайбуру рабочий пешекарвилин шагьадатнамаяр къачуда. Ида школа акьал­­­тIарайбуруз Аграрно-экономический тех­никумдик экечIунин карда куьмек гуда. Тех­никум акьалтIарайбур Дагъустандин хуьруьн майишатдин академиядин 2-курсуниз кьабулда.

Чкадал нек, емишар гьялдай ва куьлуь авунвай алаф (гранулированные корма) гьасилдай цехар акатзавай производственный база тешкилда, ана жаванриз пешекарвилин рекьяй сифтегьан чирвилер гуда. Ида хуьруьнвийриз кIвалахдалди таъмин хьунин жигьетдайни куьмекда.

Цехар чкадин хаммалдалди таъминарда.

Инвестор Марат Шайдаева лагьайвал, цехра арадал гъайи шейэр маса гунай хьайи пулунин такьатар хуьр аваданламишуниз, школадиз герек шейэр къачуниз харжда.

Школадин муаллимри Шайдаеврин хизандин тIварунихъай премияр, алава гьакъи­яр ва пишкешар къачуз им кьвед лагьай йис я.

Агропромышленный комплекс вилик тухунин программадин сергьятра аваз 2017-йисуз Цмуррин хуьруьн мулкунал 40 гектардин майданра шуьмягърин фад бегьердал къведай багъ кутурдини рикIел хкиз кIанзава. Инвестордихъ шуьмягъар хадай цех ачухдай фикирни ава.

Нариман Абдулмуталибова хуьруьн яша­йишдинни экономикадин месэлаяр гьялунин жигьетдай тухузвай кIвалахдай Марат Шайдаеваз, санлай  Шайдаеврин  хизандиз   чухсагъул малумарна.

* * *

Район, хуьр-кIвал патал менфятлу кIва­ла­хар ийизвай инсанар амай хуьрерани тIи­мил авач. ИкI, ДаркIуш-Къазмайрал инвестор Темирхан Мисрихановахъ культурадинни спортдин комплекс эцигдай фикир ава. Комплексдин сад лагьай мертебада спортзал, кьвед лагьайда шадвилерин зал ва культурадинни машгъулатрин центр кардик жеда.

Инвесторди лугьузвайвал, ихьтин комплекс эцигуни жаванризни аялриз ана чпин азад вахт менфятлудаказ кечирмишдай, гьакIни мел-мехъерар кьиле тухудай мум­кинвал гу­да, са шу­муд касдиз кIвалах­дин чкаярни жеда.

Къейд авун лазим я хьи, ДаркIуш-Къазмайрин хуьр районда чIехи­бу­рукай сад я. 2017-йисан переписдин делилралди, хуьре 2800-далай виниз инсанар яшамиш жезва. Амма хуьр арадал атайдалай инихъ ана я спортзал, я клуб, я аялрин бахча эцигнавач.

ДаркIушрин хуьруьн администрацияди хуьре 70 аялдиз чкаяр авай аялрин бахчадин­ дарамат эцигунин патахъай мад са инвестордихъ галаз рахунар кьиле тухузва.

* * *

Кьасумхуьр (адан микрорайонарни галаз) йисалай-суз чIехи, гуьрчег ва авадан жезва. И кардик кьилдин ксари-инвесторри кутазвай пай екеди я. ИкI, инвесторди 2015-йисуз Кьасумхуьруьн Мир куьчеда (ЦРБ-дилай агъадихъ) парк-аллея туькIуьрун гъиле кьунай. Алатай йисуз аниз коммуникацияр тухвана, тротуарда плитаяр туна, къелемар цана, куьсруь­яр эцигна, чиле аскIандиз экъечIдай ве­кьин тум цана ва маса кIвалахар тамамарна.

Райондин архитектурадин, эцигунрин ва ЖКХ-дин отделдин начальник Мустафа Мустафаевни галаз чкадал фейила, чаз акурвал, и йикъарани инвестордин такьатралди аллеяда аваданламишунин кIвалахар тухун давамарзава.

Эцигунардайбурун бригададин кьиле авай Мегьамедрасул Куругълиева чаз ла­гьай­вал, абуру парк-аллеяда, къецепатан уьлкведай гъана, гъулцин 14 къелем цана, ацукьдай са шумуд куьсруь, барьерар эцигна. Алай вахтунда бригада аллея тирвал куьчедин къерехдай тухванвай электрикдин симин тарар акIурунал (400 метрда), йифен вахтунда экв гудай “кобра” фонарар эцигунал ва маса кIвалахар авунал машгъул я.

— Парк-аллея Ватандин ЧIехи дя­ве­­да телеф хьанвайбур эбеди яз рикIера хуьнин лишан яз эцигнавай обелискдал кьван да­в­амар хъийида, — лагьана чаз М.Мус­тафаева.

Хайи район, хуьрер патал ихьтин хийирдин кIвалахар ийизвай мерд ксариз-инвесторриз халкьди аферин ва баркалла лугьузва.

Хазран Кьасумов