Алатай гьафтеда Ахцегь райондин Хуьруьгрин СДК-дин залда (Ахцегьа РДК ремонтзава) райондин муаллимрин совещание кьиле фена. Адан кIвалахда райондин руководстводин, общественный тешкилатрин векилри, кьиле директорар аваз образованидин идарайрин коллективри иштиракна. Мярекат кьиле тухвай РУО-дин методкабинетдин заведующий Заира Муталибовади залда авайбур тебрикна ва совещание ачухун, гьакI муаллимриз кIелунин цIийи йис мубаракун патал сифте гаф Ахцегь муниципалитетдин кьилин везифаяр тамамарзавай Вадим Агъасиеваз гана.
Ада вичин докладда къейд авурвал, РФ-дин Президент В.В.Путина 2020-йисан 21-июлдиз кьабулай 474-нумрадин Къарарда чи уьлкве 2030-йисалди стратегиядин жигьетдай вилик тухунин кьилин терефар тайинарнава. Ана къалурнавай асул месэлайрикай сад умуми образованидин еридин жигьетдай Россиядин Федерация дуьньядин лап вилик квай 10 уьлкведин жергеда гьатун я. И карда эвелимживал кар алай пуд месэладиз гузва — муаллим, технологияр ва инфраструктура.
Райондин образованидин къурулушда педагогвилин 527 къуллугъчи ава. Школаяр муаллимралди тамамвилелди таъмин туш: урус чIаланни литературадин, математикадинни информатикадин, химиядин ва ингилис чIалан муаллимрин игьтияж ава. Хейлин педагогар пенсиядин ва пенсиядив агакьзавай яшара авайбур я. Гьавиляй вилик школадиз жегьил пешекарар желбунин месэла ква.
РФ-дин Президент Владимир Путина лагьайвал, “Образованидин мягькем къурулуш кар алакьдай бажарагълу муаллимрин къуватралди арадал къведа. Ахьтин пешекарар са-сад хкягъиз, хвена кIанда”. И жигьетдай гележегдин хъсан педагогар чи выпускникрин арадай гьазурун важиблу я. Къе девирдин истемишунрив кьур ерилу образование тешкилунин асул шартI аялриз дурумлу чирвилер гунин цIийи, яни рекъемрин технологияр ишлемишунихъ, хуьруьн школайра рекъемрин ва гуманитарный образованидин центраяр — “Точки роста” (образование хкажунин пунктар) арадал гъунихъ галаз алакъалу я. ИкI, республикада гьахьтин 167 пункт кардик ква. 2021-йисан сентябрдилай абур Ахцегьрин 1 ва 2-нумрайрин, Хуьруьгрин ва КьакIарин хуьрерин СОШ-рани тешкилнава. “Гележегдин муаллим” проектдин сергьятра аваз пешекарвилин цIийи стандартрал элячIун фикирдиз къачунва. Ида чи муаллимрин саки са пай чпин пешекарвилин дережа хкажунал, абур аттестациядин цIийи къайдайрал элячIунал, яни муаллим герек авачир гьахъ-гьисабрикай азадунал гъида. Гьелбетда, чирвилер гунин ери хкажунин кIвалах аялар ватанпересвилин, яни хайи чIалаз, милли тарихдиз, культурадин ивирриз гьуьрметунин тербиядик кутазвай алава образование авачиз тамамди жедач…
Эхирдай Вадим Агъасиева муаллимриз кIелунин цIийи йис рикIин сидкьидай мад сеферда мубаракна, абуруз чандин сагъвал, муаллимвилин четин ва акьалтIай намуслу рекье пешекарвилин агалкьунар хьун алхишна. Йисан эхирра гьукуматдин имтигьанрай хъсан нетижаяр къазанмишун патал муаллимризни аялрин диде-бубайриз, йисан сифтедилай эгечIна, гьакъисагъвилелди зегьмет чIугуниз, образованидин месэлайрив акьалтIай жавабдарвилелди эгечIуниз эвер гана.
КIелунин цIийи йисаз талукь яз экрандилай РФ-дин просвещенидин министр Сергей Кравцован видеообращенидихъ ва РФ-динни РД-дин гимнрихъ, кIвачел акъвазна, яб акалайдалай кьулухъ микрофондихъ “Чирвилерни тербия гунин цIийи еридихъ” месэладай совещанидин кьилин доклад гваз райондин образованидин управленидин начальник Алмас Гьажиев экъечIна.
Совещанидал общественный палатадин председатель Али Исмаилов (ада школайра насигьатчивал, яни тежрибалу муаллимри жегьилар чпин гуьзчивилик кутунин къайда арадал хкун, школайра тербиядинни чирвилер гунин кIвалах активламишунин мураддалди диде-бубайрин комитетар цIийи кьилелай хкягъун теклифна) ва маса муаллимар рахана.
Дашдемир Шерифалиев
