29-августдиз Къара-Куьре хуьре Украинада кьиле тухузвай махсус серенжемда телеф хьайи Радик Нагъметуллаеваз мемориалдин кьул ачухунин мярекат кьиле фена.
Перишан мярекатда “Докъузпара район” муниципалитетдин кьил Мегьамед Шамилова, адан заместителар тир Салигь Гьажимурадова, Акиф Балакишиева, райондин виликан кьил Абдурагьим Алискерова, хуьрерин администрацийрин кьилери, мукьва-кьилийри ва хуьруьнбуру иштиракна.
Мярекат ачухай Къара-Куьре хуьруьн администрациядин кьил Гьасанбег Балабегова малумарна хьи, Докъузпара райондин администрациядин регьберди Украинада телеф хьайи районэгьлияр рикIел аламукьдайвал авун патал серенжемар тешкилун теклифнавай. Къенин мярекат арадиз атун патални ада хейлин куьмек гана.
“Украинада кьиле тухузвай махсус серенжемдикай чаз къе виридаз хабар я. Им, гьелбетда, чарасуз кар я. Эгер чи уьлкведин кьилевайбуру ихьтин кар тавунайтIа, миллетбазри Донбассдин шегьеррал, хуьрерал вегьедай. Ана кьиле физвай женгера чи 4 хва телеф хьана. Радик заз лап къени, хъсан жегьил хьиз чидай. Ам чи рикIерани гьахьтинди яз амукьда. Чпин везифаяр викIегьвилелди тамамарай чи рухвайрин кьегьалвилер “Жуьрэтлувиляй” ордендалди къейдна. Къуй мад са аскерни телеф тахьурай. Чна сабурлувал хуьн лазим я. Чун гъалибни жеда!” — лагьана Мегьамед Шамилова. Ада Радик хьтин викIегь хва тербияламишай Малик Гьамидуллагьовичаз сагърай лагьана.
Мемориалдин кьул ачухзавай чкадал Радикан ими, цIийи технологийрин международный академиядин академик, экономикадин илимрин доктор, профессор Букар Нагъметуллаевни хтанвай. Инсанрин рикIера амукьдай кардик кьил кутунай ада райондин чIехибуруз сагърай лагьана.
КIватI хьанвайбуруз, Радикан бубадиз, хизандиз, мукьва-кьилийриз Абдурагьим Алискеровани башсагълугъвилин гафар лагьана.
Чи мухбир
