Махсус серенжемдикай

31-августдиз РФ-дин оборонадин министерстводи малумарай делилралди, махсус серенжем кьиле тухунив эге­чIай­далай инихъ Россиядин Яракьлу Къуватри Украинадин 280 самолет ва 151 вертолет, зенитный ракетайрин 371 комплекс, пилот галачиз лув гудай 1844 аппарат, 4592 танк ва дяведин маса машинар, РСЗО-дин 822  машин, артиллериядин ва маса 3360 яракь, военный махсус 5155  автомашин тергна.

Яракьар куьтягь жезва

Германиядин оборонадин министерстводин кьил К.Ламбрехта малумарнавайвал, Украинадиз ракъурдай яракьар уьлкведихъ амукьзавач. Чкадин чешмейрал асаслу яз, идакай “Новости” РИА-ди хабар гузва.

“Министр яз, зун хиве кьуниз мажбур я: ракъуриз жедай кьван яракьар амачир гьалдиз мукьва жезва чун”, — лагьана Ламбрехта министррин заседанидин вахтунда.

Яракьар кьит жезвайдакай са гьафте идалай вилик Германиядин къецепатан крарин министр А.Бербокани малумарнай.

Россиядин МИД-дин кьил Сергей Лаврова идалай вилик къейд­най хьи, Украина яракьралди ацIуруналди, НАТО “цIухъ галаз къугъ­вазва”. Министрди тагькимарнай хьи, Украина патал ракъур­завай яракьрин гьар гьихьтин пар хьайитIани, Россиядин терефди ам кукIварун къанунлу макьсад яз гьисабда.

Польшади тIалабзава

Варшавади Париждивай Украинадиз яракьар агакьарунин кар йигинарун тIалабна. Идакай “Новости” РИА-ди хабар гузва.

“За Франциядин президент Э.Макронавай Украинадиз яракьар­ ракъуруник йигинвал кутунин, гьакIни пулунин жигьетдай мадни гзаф куьмек гунин патахъай тIалабна”, — лагьана Польшадин премь­ер-министр М.Моравецкийди.

Идалай вилик ада малумарнай хьи, Польшади ЕС-дин уьлквейри россиявийриз, гуманитарный визайрилай гъейри, амайбур вири къадагъа авунин тереф хуьзва.

Чинебан рекьер жагъурзава

Украинадин гьаларихъ галаз алакъалу яз Россиядай эхкъе­чIуниз мажбур хьанвай Америкадин са жерге тешкилатри чи уьлкведихъ галаз чинебадаказ алишверишдал машгъул жедай рекьер жагъурзава.

“Новости” РИА-ди хабар гузвайвал, Америкадин бязи тешкилатри Туьркия арада аваз Россиядихъ галаз сирлудаказ чпин алвер-савда кьиле тухун патал, тайин гьакъини гуналди, туьркверин тешкилатриз теклифзава.

Къейдзавайвал, Америкадин тешкилатри Россиядин метягьар “Россия-Туьркия-Дубай-США” маршрутдай маса къачузва. Абуру асул гьисабдай нефтехимиядиз, багьа къванеризни металлриз, ракьуз, гьулдандиз, миянардай шейэриз ва маса метягьриз  итиж ийизва.

ЕС гегьеншаруниз эвер гана

ФРГ-дин канцлер О.Шольцан фикирдалди, Украина, Рагъ­акIи­дай патан Балканар, Молдавия, гележегда Гуржистанни кутуналди, Евросоюз гегьенш хьун герек я. Канцлерди Прагадин университетда лагьай гафар “Reuters” чешмеди раижна.

Рехъ гана кIанзавач

Вашингтонда авай Китайдин векилханадин пресс-секретарди малумарнавайвал, США-ди Тайвандиз яракьар маса гунин кардал эхир эцигун лазим я. Военный жигьетдай жезвай гьар гьихьтин рафтарвилер хьайитIани, абуру “са Китайдин” принципар чIурзава. Идакай “ТАСС” чешмеда кхьенва.

Гереквал авач

Уьлкведин Роспотребнадзордин пресс-къуллугъди малумарнавайвал, мектебра ва образованидин маса идарайра тIугъ­валдиз акси серенжемар кардик кухтунин гереквал авач.

РикIел хкизвайвал, ковиддикай хуьнин виридалайни мягькем­ къайда адаз акси раб ягъун я. РФ-дин здравоохраненидин ми­нистр М.Мурашкодин гафаралди, азарханайра къатканвай начагъбурун чIехи пай вирусдиз акси раб ягъ тавунвайбур я.

ЦIухъ галаз женг

Рязандин областда тамари кьунвай цIаярихъ галаз женг тухун­ патал анриз саки 25 агъзур тонн яд яна, хабар гузва “Новости” РИА-ди.

Нижний Новгороддин областдин ва Марий Эл республикадин мулкарин тамари кьунвай цIаяр туьхуьрун патал 3,2 агъзур тонндилай виниз яд ишлемишна.

Чешмедин делилралди, уьленра авай ицIи кул-кусар элуьхъ­на кун давам жезвайвиляй гумади кьунвай чкайрихъ галаз къуллугъчийри  гьеле женг тухузма.

«Лезги газет»