2023-йисан эхирдалди Дагъустанда яшайишдин 70 объект эцигна акьалтIарун фикирдиз къачунва. Идакай “ТАСС” чешмеди хабар гузва. РД-дин гьукумдарри мукьвал тир 2 йисан муддатда мектебарни аялрин бахчаяр эцигунин кардиз федеральный бюджетдай 1,6 миллиард манат алава такьатар серфда. Алава пул чара хъувунин чарасузвал материалрин къиметар хкаж хьунихъ галаз алакъалу я.
РД-дин эцигунрин, архитектурадин ва ЖКХ-дин министр Артур Сулейманова къейд авурвал, маса регионрив гекъигайла, Дагъустанда мектебарни аялрин бахчаяр гзаф эцигзава. “Ихтилат физвай 1,6 миллиард манат къиметар хкаж хьун себеб яз чара хъувунва”, — лагьана министрди.
Къведай йисуз ишлемишиз вахкудай мектебринни аялрин бахчайрин дараматриз талукь яз пудратчийри алай вахтунда проектар туькIуьрзава, бязи объектрал эцигунрин кIвалахрив эгечIнава.
РД-дин образованидин ва илимдин министерстводи хабар гузвайвал, 1-сентябрдиз республикада 1416 мектебди (абурукай 4 — цIийибур, 161 капитальнидаказ ремонт авунвайбур я) ракIарар ачухда.
«Лезги газет»
