“Лезги газетдин” алай йисан 30-нумрадин 9-чинай, гьуьрметлу кIелзавайбур, квев зи шел-хвал агакьайвал, Дагъустан Республикада авай Пенсийрин фондуни 2-сефер яз, 9 йисалай, 2020-йисан 14-январдиз хганвай жавабдай аквазвайвал, 2011-йисан 1-августдилай 2014-йисан 31-июлдалди Пенсийрин фондуниз ганвай взносрин кьадардиз килигна, пенсия артухарнава.
Дугъриданни, 2014-йисан июлдин вацра пенсия — 13 225, августдин вацра -17 269, сентябрдилай 13 492 манатдин кьадарда аваз ганва.
Гьайиф хьи, къулайсузвал къулайвили рикIелай алудда лагьайвал, жув кIвалахдик квайла, пенсияни, мажибни гъилиз къвезвайла, дуьз лагьайтIа, югъ-къандавай хкаж жезвай базардин метягьрин — шейэринни дарманрин къиметрикай са артух фикир хьанач… Вири уьлкведа ава кьван и багьавал лугьуз, сабур гузвай жува-жуваз. Амма гила, школада кIвалах техжедайла, духтурри меслят къалурзавай кьван дарманриз пул бес тежезвайла, Махачкъалада адвокатрин палатадиз и агьвалатдикай хабар гайила, заз адвокат Абдурагьманов Сабир Тагъиевича куьмек гана.
Ада суддиз расчетарни галаз арза рекье туна. Лагьана хьи, 2014-йисан 1-январдилай 2020-йисан 1-февралдал кьван кIвалахзамачир пенсионердин пенсиядин кьадар 20 534,45 тайинарна ва 2011-йисан 1-августдилай 2020-йисан 31-июлдалди Пенсийрин фондуниз зи патай атай взносриз килигна, 2014-йисан 1-августдилай артухарай пенсиядин кьадардай 78 112 манатни 88 кепек вахкуниз Россиядин Пенсийрин фондунин Дагъустанда авай отделение мажбур ийин. Амма Мегьарамдхуьруьн райондин судди за авур тIалабун кьилиз акъуднач. Дагъустан Республикадин Верховный суддиз шикаят авуникди Мегьарамдхуьруьн райондин суддиз месэладиз 2-сеферда, 2020-йисан 2-декабрдиз, кихлигун эмирна. Мегьарамдхуьруьн райондин судди 2020-йисан 9-июлдиз акъудай къарар къуватда туна: 78 112 манатни 88 кепек вахкун тийин ва пенсиядин кьадарни 2020-йисан январдилай 15 990,93 тайинар тийин.
Вучиз? Зун Россиядин ватандаш тушни, талукь тушни заз адан Конституция, ГПК (Гражданский процессуальный кодекс)? Къекъвена зунни и рекьера… Дагъустан Республикадин Верховный суддин апелляционный инстанцияди вичин определенийра (2014-йисан 5-февралдизни 2021-йисан 10-мартдиз акъудай) Мегьарамдхуьруьн райондин 2-суддин къарар къуватда туна. Региондин 5-кассационный суд зи месэладин гьакъиндай вичел Мегьарамдхуьруьн райсуддай майдин вацра агакьай шикаятриз 2021-йисан 14-декабрдиз килигна. Нетижада Россиядин Пенсийрин фондуниз атанвай взносрин кьадардиз килигна, къвезвай кьадардилай артухарна таганвай пенсиядин кьадар вахкун тавун ва гьакъикъатдани кIвалах техйизвай пенсионердиз къвезвай пенсиядин гьахъ-гьисаб дуьз тахвунин къарар къуватда туна.
Зун Дагъустан Республикада авай Силисдин комитетдин управленидин регьбердин заместитель Балашов Егор Сергеевича кьабулайдалай кьулухъ РД-дин Пенсийрин фондуни 2021-йисан 21-апрелдиз 418-нумра алаз рахкурнавай жавабда къейднава: “На 01.02. 2020 года вам без учета индексаций выплачивалась пенсия в размере 15 990,93”. Къейд ийин хьи, пенсиядин гьа и кьадар зи адвокатди гьазурнавай расчетрани къалурнава.
Заз РД-дин Пенсийрин фондуни 2020-йисан 14-январдиз рахкурнавай жавабдай аквазвайвал, 2014-йисан 1-августдилай артухарнавай пенсиядин кьадар — 17 269 манат вилик квай пуд йисуз Пенсийрин фондуниз атанвай взносриз килигай гьакъи я. Вични 2011-йисан 1-августдилай 2014-йисан 31-июлдалди гьукуматди заминламишнавай. Ам 2014-йисан сентябрдилай тIимиларнава. Гьа и кардиз, вучиз ятIани, я Мегьарамдхуьруьн райондин, я РД-дин Верховный, я умуми юрисдикциядин региондин 5-кассационный судри лазим тир къимет ганач. Я зи ходатайствони садани кьабулнач.
Россиядин Пенсийрин Фондунин РД-да авай Отделенидин кIвалахдал гуьзчивал тухузвай общественный приемныйдай, 2022-йисан 17-июндиз зун и шикаят гваз кьабулнатIани, гьелелиг жаваб хтанвач. Чкадал хъфена, хабар хкьурла, ихьтин жаваб хгана: “Сентябрдиз хъша, куьн кьабулай кас отпускда ава. Жавабни гьам хтайла гьазур жеда…”.
Нетижада зун Конституцияди заминламишнавай ихтияррикай магьрумнавай гражданиндиз элкъвенва. Гьакъикъат, гьахъвал авай затI я. Гьеле къекъвезма…
Абдулашим Гьажимурадов
