CТIАЛ СУЛЕЙМАНАН ШИИРАТДИН ЙИКЪАР

Чаз виридаз чизвайвал, Сулейман буба зегьметдал рикI алай инсан тир. Ам гьатта кьуьзуь хьайилани зегьметдивай къерех хьанач.  Вичин дустар тир бязи кьуьзекрал, ада кIвалахзавач лугьуз, зарафатдин хъуьруьнардалдай ва  абуруз сатирадин кьвед-пуд бендиникай ибарат тир шиирарни туькIуьр­дай. И чIавуз абурни Сулейман бубадихъ галаз хъуьредай ва низ бахшнавай шиир хциди хьанва лугьуз, гьуьжетра жедай.

Сулейман бубадин музейдин къуллугъчиди заз шаирдин рикI зегьметдал хьуникай ахъагъай са ихтилат, вахт фен­ватIани, зи рикIелай алатзавач:

— Югъ гатун ва чимиди тир. Сулейман буба хуьруьн колхозчийрихъ галаз чуьлдиз экъечI­навай. Бригадирдиз чIехи шаирдиз, кьуьзуь кас я лагьана, регьят кIвалах гуз кIан хьана. Амма Сулейман бубади адан фикир инкарна ва  вичиз колхоздин багъдиз яд гудай кIвалах гун тIалабна. Бригадирдизни  чара хьанач.

Рагъ цавун юкьвал къугъвазвай. Бирдан багъдин къерехда кIвалахзавай лежбердиз Агъа СтIалдал руг кьилеллаз машин фейиди акуна. А чIавуз машинар лап кьит тир. Нин патав фирай кьван чIулав машин? Тек са Сулейман бубадин. И кар лежберди кьатIана ва шаирдиз вичиз акурвал ахъайна.

— Эхь, зи патав я. Зун исятда хъфена — хкведа.

— Багъдихъ галай яд атIудани?

— Ваъ, са вил ягъа. За са акьван геждач.

Гьекьни каф хьана, Сулейман буба кIвализ­­ хтана. Адаз акуна хьи, гьаятда чIулав ма­шин­дин патав Нажмудин Самурский акъвазнава. Шад хьайи танишар — дустар къужахра гьатна­. Нажмудина хваш -беш авуна, гьал-агьвалдикай хабар кьуна. Сулеймана ам багъдиз тухва­на, кьведни ичин тарцин сериндик эцигнавай столдихъ ацукьна. Абуру тадиз вилик гъайи мехмери чайдикай лезет хкудиз башламишна­.

— Ваз и къенфетар гьинай я? — хабар кьуна Самурскийди, вилик квай шекерданда авай цIурурнавай шекердизни къенфетриз вилеривди  ишара авуна.

— Туьквендай, — жаваб гана Сулейман бубади.

— Вахъ абур къачудай пул авани?

— Гьа кимини туш, юлдаш Нажмудин.

— Дуьз я, вахъ пул ава. Ленинан ордендай вацра 30 манат ва 120 манат пенсияни ваз гьукуматди ял ягъун патал­ гузва, кIва­лах­ал фин патал ваъ. Им ваз ви шииррай къвезвай къазанжидилай гъейри.

— Юлдаш Самурский, — лагьана, Сулейман бубади вичин ракъини кана къумраларнавай яхун гъилин тIуб хкажна. — Вуна дуьз лугьузва. Зи чуруни кьил рехи хьанва, амма зи къенепатан дуьньяда гатфар ава.

— Ваз банкуна вахъ гьикьван пул аватIа чидани?

— Чида.

— Гьикьван ава?

— Ам ваз хъсан чир хьуй. Зун са кьуьзуь кас я, гьисабар течидай, — хъуьрена шаир.

— Ви кIвачихъ галай пул неинки са ви хизандивай, гьатта ви рухвайрин хизанривайни садлагьана куьтягьиз жедач. А пулар гьиниз авурай?

— Гьиниз авурай? — суалдин жуьреда вичин чиник дегишвал кутуна Сулейман бубади. — ГьиниздатIа чидани ваз? Мектеб эциг, рехъ туькIуьр, кесибрин аялриз куьмекар це. За ихтияр гузва, юлдаш Нажмудин. Ам зи тIалабунни я.

ЧIехи шаирдал са кьил чIугваз атай Наж­мудин Самурский яргъалди ацукьнач. КIва­линбуруз сагърай лагьана, Сулейман бубани вахчуна, сефердиз эхкъечIна. Колхоздин багъдин къерехдал машиндай эхвичIай Сулейман бубади вичин кIвалах давамар хъувуна.

Шаирдинни Нажмудин Самурскийдин чин — чинал хъхьай и гуьруьш эхиримжиди хьаналда. Амма ахьтин кьисметдикай абуруз садазни гьеле чизвачир.

Абдул Ашурагъаев, муаллим