РД-дин здравоохраненидин министерстводи
“Земский духтур, фельдшер” программадай пешекарриз кlвалах теклифзава
“Здравоохранение” милли проектдин ва здравоохраненидин эвелимжи хел цlийи хъувунин махсус программадин сергьятра аваз республикадин здравоохраненидин министерстводи духтурар хуьрера кlвалахал желбунин кар давамарзава.
2022-йисуз пешекарриз “Земский духтур” программадай хуьрерани, гъвечlи шегьеррани (Къизилюрт, Южно-Сухокумск, Дагъустандин Огни) кlвалахдив эгечlдай мумкинвал ава. Программада иштиракиз кlанзавайбурун документар гьар юкъуз сятдин нисинин 2-далай нянин 5-далди республикадин Минздравдин кадрийрин отделди кьабулзава.
Рикlел хкизвайвал, “Земский духтур, фельдшер” программада иштиракдай духтурдиз са сеферда яз 1 миллион манат пул гузва, фельдшердиз — 500 агъзур манат. Республикадин яргъа авай, четиндиз физ жедай хуьрериз (ихьтин чкайрин сиягь 2006-йисан майдиз РД-дин Халкьдин Собраниди тестикьарнавай 25-нумрадин къанундалди тайинарнава) кlвалахал фенвай духтурриз 1,5 миллион манат гузва, фельдшерриз — 750 агъзур манат. Программада иштиракзавай пешекарди 5 йисалай тlимил тушиз кlвалах авун (декретдин отпускдин муддат квачиз) кьилин шартl я.
Тlвар кьунвай программа республикада 2012-йисалай кьилиз акъудзава. И муддатда адан сергьятра аваз 1500 духтур кlвалахал акъвазна. 2022-йисуз духтурар патал — 171 чка, фельдшерар патал 13 чка тайинарнава.
Программада иштиракуниз талукь тир са жерге суалриз РД-дин Минздравди жавабар ганва.
- Программада са шумуд сеферда иштиракдай ихтияр авани?
— Ваъ, анжах са сеферда иштиракдай мумкинвал ава.
- Кlвалахзавай чка дегишарна, пешекардин игьтияж авай маса хуьруьз куьч хьана, программада иштиракдай ихтияр авани?
— Эгер пешекарди идалай вилик программада иштиракнавачтlа, ихтияр ава.
- Пешекарривай яшайишдин жигьетдай алава куьмекрик умуд кутаз жедани?
— Эхь, гзаф районри программадин сергьятра аваз духтурвиле кlвалахиз къвезвай пешекарриз кlвалер эцигдай чилин участок, аялрин бахчада нубатсуздаказ чкаяр гузва ва икl мад.
- Кlвалахдай азад чкаяр авай сиягьдихъ галаз гьина таниш жедай мумкинвал ава?
— РД-дин здравоохраненидин министерстводин сайтдай. Гзафни-гзаф анестезиолог-реаниматологрин, участокдин терапевтрин, аялрин духтуррин, рентгенологрин ва масабурун игьтияж ава.
«Лезги газет»
