Дагъустандин мектебра тамам ремонтар кьиле тухузвай гьалдиз талукь яз алатай хемисдиз РД-дин Гьукуматдин Председатель Абдулмуслим Абдулмуслимован регьбервилик кваз кьиле фейи совещанидал веревирдер авуна.
Алай вахтунда “РД-дин школайрин образованидин системаяр цIийикIа хъувун” проектдин сергьятра аваз 191 мектебдин 210 дараматда ремонтдин кIвалахар давам жезва. И хилез санлай 3 миллиард манат чара авунва, 1,4 миллиард манатдихъ алай аямдин тадаракар ва мебель маса къачунва.
А.Абдулмуслимова къейд авурвал, республикадин 12 мектебда ремонтдин кIвалахар лап яваш еришралди кьиле физва. Кьилди къачуртIа, кIелунин цIийи йис гатIундалди Акуша, Ахцегь, Леваша, ЦIумада, Шамил районра ва Махачкъала шегьерда ремонтдин кIвалахрик гьерекат кухтунин гереквал авай мектебар ама.
Премьер-министрди ремонтдин вири кIвалахар вахтунда куьтягьунин гьакъиндай РД-дин Кьил Сергей Меликова гайи тапшуругъар кьилиз акъудун лазим тирди ва гьар са муниципалитетдин регьбердин хиве и жигьетдай жавабдарвал гьатзавайди рикIел хкана.
КIелунин цIийи йисуз Дагъустандин мектебриз 450 агъзурдалай гзаф аялар фида. “Аялар патал 1-сентябрь — Чирвилерин югъ — халисан сувариз элкъуьн чун патал гзаф важиблу я. Аялар алай девирдихъ галаз кьазвай, цIийи хъувунвай мектебриз фин патал чна чалай аслу вири крар кьилиз акъудна кIанда”, — лагьана А.Абдулмуслимова.
Икьван чIавалди кьиле тухванвай кIвалахрикай галай-галайвал РД-дин образованидин ва илимдин министр Ягья Бучаева малуматар гана. Къейд авурвал, муниципалитетриз ракъурнавай такьатрикай 2 миллиардни 36 миллион талукь рекьериз серфнава, яни ремонтрин кIвалахар 77 процентдин тамамарнава. Чара авунвай такьатрикай муниципалитетри 607,8 миллион манатдикай гьеле менфят къачунвач.
“Ишлемиш тавуна амай такьатри ахьтин йикъал гъизва хьи, куь (муниципалитетрин — авт.) пудратчияр чпин рабочийриз гудай пул авачиз амукьзава, абурун патай чав шикаятарни агакьзава. Гьавиляй тади гьалда технадзордихъ галаз санал и месэлаяр гьялун, тамамарнавай кIвалахдай гьакъи гун лазим я”, — лагьана Я.Бучаева.
Министрдин гафаралди, ремонтдин серенжемар кьилиз акъудунин жигьетдай вири школайрин гьазурлухвал 95 процентдиз барабар я.
Видеоконференц-алакъадин куьмекдалди Абдулмуслим Абдулмуслимова винидихъ тIварар кьунвай районрин кьилерин докладрихъ яб акална. Махачкъаладин мэр С.Дадаеван гафаралди, шегьерда гьазурвал акунин кIвалахар тамамдиз кьилиз акъудна акьалтIариз тахьунин къурхулувал авай 2 мектеб ама — 39-нумрадин лицей ва 28-нумрадин гимназия.
Мисал яз, бязи мектебра, ремонтар ийидайла, алава кIвалахарни пайда хъжезва ва ида энгелвилерал гъизва.
«Лезги газет»
