И йикъара Мегьарамдхуьруьн райондин администрацияда кьиле фейи АТК-дин нубатдин заседанидал Чирвилерин йикъаз гьазур хьунин месэлани веревирдна. Гегьенш мярекатда РД-дин Гьукуматдин Председателдин заместитель Р.Жафарова, райондин кьил Ф.Агьмедова, Россиядин ФСБ-дин сергьятрин рекьяй Дагъустанда авай управленидин начальник А.Карпенкоди ва маса вилик-кьилик квай векилри, жавабдар къуллугъчийри, депутатри иштиракна.
Райондин регьберди къайдаяр хуьдай органрини чкадин самоуправленидин векилри терроризмдиз акси серенжемар кьабулунин карда санал кIвалахунин чарасузвал къейдна. Гьа са вахтунда къенин девирда пайда жезвай тапан малуматрихъ галазни женг тухун рикIел хкана.
Чирвилерин йикъан мярекатар тухудайла, образованидин объектар терроризмдикай хуьнин, жемиятдин хатасузвал, къайдаяр хуьн таъминарунин гьакъиндай полициядин начальникдин заместитель С.Селимова доклад авуна.
Заседанидин вахтунда Рамазан Жафарова хуьрерин кьилеривай вири мектебриз улакьар авани-авачни, абуруз талукь техосмотр авунвани-авунвачни хабарар кьуна.
Билбил-Къазмайрин хуьруьн администрациядин кьили мектебдин дарамат авариядин гьалда авайдакай хабар гана. Райондин кьили малумарайвал, и хуьре цIийи мектеб эцигна куьтягьунин месэла хциди тирдакай РД-дин Кьил С.Меликовазни хабар ганва ва гуьзчивилик кутунва.
Эхирдай Р.Жафарова райондин АТК-ди тухванвай кIвалахдиз санлай разивилин къимет гана.
«Лезги газет»
