Кьуьчхуьрви Латифов Агьмадан руш Заради лап жегьил чIавалай комсомолди, партияди, гьукуматди вичел тапшурмишай жавабдар къуллугъар лайихлувилелди, бегьерлувилелди, жемятдин, халкьдин итижар вилик кутаз, къени крарин вилик жергейра жез тамамарна ва гьа идалди вири республикада, адалай къецени гьуьрмет къазанмишна.
Зара Агьмадовнадин чирвилер, алакьунар, башчивилин, регьбервилин бажарагъ, зегьметчи инсанрив къайгъударвилелди эгечIунин ери кьуру чкадал арадал атанач. Ада тежрибани, инсанрихъ галаз рахадай тегьерни, коллективриз регьбервал гудай алакьунарни, вич чидай кьванбурун патай гьуьрметни ВЛКСМ-дин Мегьарамдхуьруьн райкомдин 1-секретарвиле, КПСС-дин Агъул райкомдин 2-секретарвиле, Мегьарамдхуьруьн райисполкомдин председателвиле, Дагъустандин обкомдин алишверишдин ва агьалийриз яшайишдин рекьяй къуллугъ авунин отделдин заведующийвиле, ДАССР-дин недай-хъвадай шейэрин промышленностдин ва ахпа соцобеспеченидин министрвиле, КПСС-дин Мегьарамдхуьруьн райкомдин 1-секретарвиле кIвалахдайла, са шумуд сеферда ДАССР-дин Верховный Советдин депутатвиле хкягъайла, кIватIна, къачуна. Къуллугърикай азад хьайила, Зара Агьмадовнади, РД-дин агъсакъалрин советдин векил яз, общественный крарани вичин активвал къалурна ва гилани и важиблу везифа давамарзава. Инсанвилин, пешекарвилин, намуслувилин, ахлакьдин ва марифатдин жигьетдай ам къенин руководителри чешне къачудай инсан я.
Государстводин, общественный деятелдин лайихлувилер фикирда кьуна, и мукьвара Зара Агьмадовна Латифовадиз “Дагъустан Республикадин вилик лайихлувилерай” орден гана.
Чна адаз республикадин шабагь тебрикзава. Сагъвал хьурай вахъ, чи такабурлу вах!
«Лезги газет»
