Дагъустанда 2022-йисуз кIелунра агалкьунар къазанмишай 30 школьникдиз гьардаз 100 агъзур манат пул гана. Идакай саласадиз кьиле фейи республикадин образованидин работникрин августдин совещанидал РД-дин Гьукуматдин Председатель Абдулмуслим Абдулмуслимова ихтилатна.
Премьер-министрди къейд авурвал, аялрик кIелунин, ерилу чирвилер къачунин карда ашкъи кутадай шартIар тешкилун чарасуз я. “Алатай йисалай эгечIна, Вирироссиядин олимпиадайра гъалиб хьайибурузни хъсан чкаяр кьурбуруз, абурун насигьатчийриз, гьакIни ЕГЭ-дай 100 балл къазанмишай выпускникриз 100 агъзур манатдин премия гузва. ЦIинин йисуз пулунин пишкешар 30 школьникдизни 3 муаллимдиз гана”, — лагьана А.Абдулмуслимова.
Къейд авурвал, 2022-йисуз «Земский муаллим» программа уьмуьрдиз кечирмишунин сергьятра аваз хуьрерин мектебриз 93 муаллим рекье твада. Абуруз гьар садаз 1 миллион манат пул гуда.
Алай девирда жегьилриз ватанпересвилин тербия гунин месэла важиблу хьуниз килигна, 1-сентябрдилай Дагъустандин мектебра тербиядин кIвалахдин рекьяй меслятчидин къуллугъ кардик кутазва.
«Лезги газет»
