22-августдиз Дагъустан Республикадин Гьукуматдин Председатель Абдулмуслим Абдулмуслимован регьбервилик кваз регионда,  къецепатан гьаларни фикирда кьуна, экономика дурумлу­ви­лел­ди­ вилик фин  таъминарунин рекьяй Оперативный штабдин заседание кьиле фе­на. Анал республика патал кар алай мес­элаяр веревирдна: ЖКХ-дин карханаяр хъуь­тIуьз гьазур хьун, школаяр капре­монт аву­нин программа уьмуьрдиз кечирмишун, республикада инвестицийрин кIва­лахдиз гьукуматдин патай куьмек гунихъ эл­къуьр­­навай законодательный актарик дегишвилер кухтун ва масабур.

Мярекат ачухдайла, А.Абдулмуслимова къейдна хьи, алай вахтунда республикадин яшайишдинни коммунальный ма­йишатда гьалар тарифдайбур туш. Ада рикIел хкайвал, республикадин энергетикадин ва ЖКХ-дин  карханаяр  экономикадин рекьяй дурумлувилелди вилик тухуниз талукьарнавай региондин прог­рамма уьмуьрдиз кечирмишун патал Россиядин Гьукуматди Дагъустандиз 735 миллион ма­нат чара ийидай къарар кьабулнава.

“И программа уьмуьрдиз кечирмишуни ЖКХ-дин карханайра гьалар хъсан па­тахъ дегишардай мумкинвал гуда.  Яша­­йишдинни коммунальный къуллугъар ерилудаказ авунин жигьетдай агьалийрин игьтияжар таъминарун патал алай аямдин­ къуватлу тадаракар ишлемишун, ком­му­никацийрин къурулушар дегишарун лазим я. Виридан фикир а кардал желб ийиз кIан­зава хьи, хъуьтIуьз гьазур хьунин­ шартIа­рикай сад муниципальный теш­килатрихъ чеб гьазур хьанвайди тестикьар­завай паспортар хьун я”, — лагьана А.Абдулмуслимова.

Коммунальный комплексдин карханаяр ва яшайишдин кIвалер зулунни  хъуь­тIуьн  варцара кIвалахдайвал гьазур хьуникай РД-дин эцигунрин, архитектурадин ва ЖКХ-дин министр Артур Сулейманова суьгьбетна. Ада хабар гайивал, ЖКХ-дин карханаяр кьуьд акъудуниз гьазурлухвили 62 процент тешкилзава. ИкI, шегьеррани районра зулунни хъуьтIуьн варцара кIвалахдайвал 7,9 миллион квадратный метрдин майдандин яшайишдин кIва­лер, 229 къазанхана, чимивилин центральный 13 пункт гьазур я. 73,9 километрдин цин куьгьне сетар,  канализациядин 18,5 ки­лометр, чимивилин 16,4 километрдин сетар капитальнидаказ ремонтнава.

Яшайишдинни коммунальный къуллугъар авунай алай йисан сад лагьай квар­талда  гайи пулари 64,6 процент тешкилзава. Гъилевай йисан 1-июлдин делилралди,  энергоресурсар  ишлемишунай республикадин ЖКХ-дин карханаяр 9,5 миллиард манатдин буржлу яз ама.

“Россети Северный Кавказ” ПАО-дин кьилин инженер, генеральный директордин сад лагьай заместитель  Виктор Абаимова  электроэнергетикадин ва газдин карханаяр хъуьтIуьз гьазур хьуникай суьгьбетна. Адан гафаралди, республикадин муниципалитетра  ракьунни бетондин дестекар дегишарзава, трансформаторрин пунктар ремонтзава ва герек маса  крарни кьилиз акъудзава.

РД-дин зегьметдин ва яшайишдин ре­кьяй вилик финин министрдин заместитель Мегьамедзагьид Кихасурова  ЖКХ-дин ГИС-да закондин бинедаллаз  са бязи агьалийриз яшайишдин рекьяй куьмек гуниз талукь малумат эцигнавайдакай ­ла­гьана. Адан гафаралди, республикада яша­­­йишдинни коммунальный къуллугърай ийизвай харжарай эвездин пулар хгузвай хейлин агьалияр ава. Абурун кьадар  220 агъзур касдилай виниз я. Агьа­лийриз чир хьун лазим я хьи, коммунальный къул­­лугърай буржар алай агьалийриз эвездин пулар гузвач.

2022-йисуз умуми образованидин идараяр капитальнидаказ ремонт авуникай РД-дин образованидин ва илимдин министр Ягья Бучаева малумат гана. ИкI, 28 муниципалитетдин юкьван 95 школада ремонт авунин кIвалахар саки акьал­тIар­зава. 11 муниципалитетдин 32 школада  ре­­монтдин кIвалахар 98-99 процентдин кьилиз акъуднава. 71 школада и кIва­лахар бегьемарнава.

РД-дин эцигунрин, архитектурадин ва ЖКХ-дин министр Артур Сулейманова ма­лумарайвал, 2024-2025-йисара школаяр капитальнидаказ ремонт авунин  прог­раммадик кутун патал 13-июлдилай 19-августдалди  218 арза атанва.

Республикадин мулкуна государстводин патай  инвестицийрин кIвалахдиз  куьмек гун патал  региондин бязи законодательный актарик дегишвилер кухтунин гьа­къиндай  ихтилат  РД-дин карчивилин ва инвестицийрин рекьяй агентстводин регьбер Артем Хрюкина авуна.

Ада лагьайвал,  республикада  инвес­тицийринни карчивилин кIвалах къайдадик кутадайвал, нормативно-правовой база алай вахтунихъ галаз кьадайвал туь­кIуьрунин гьакъиндай тапшуругъ РД-дин Кьил Сергей Меликова гана. И месэладихъ галаз алакъалу яз, ада къуватда авай Закондин  сад лагьай статьядин  1-4  пунктунин паярик дегишвилер кухтуна кIанзавайдакай лагьана.

Агентстводин регьберди къейд авурвал, алай вахтунда туризмдин хел вилик ту­хун республика патал лап кар алай  месэла я.

Мярекатдал  рахайбурухъ яб акалайдалай гуьгъуьниз А.Абдулмуслимова  ше­­­гьеррин ва районрин  администрацийриз  чкайрал  яшайишдинни коммунальный майишат хъуьтIуьз гьазур хьунин му­ниципальный штабар ва карханаяр  гьазур­ хьуниз къимет гудай комиссияр тешкилун ва гьакIни чимивал гудай карханайри энергоресурсар ишлемишунай чпел алай буржар  ахлудун теклифна.

«Лезги газет»