Юзан тийидай эменнидихъ галаз алакъалу вири икьрарар МФЦ-дин пешекарри къулай шартIара тадиз, ихтибарлудаказ ва жавабдардаказ кьилиз акъудзава. КIвалер, чилер маса къачун ва я гун патал чарар-цIарар туькIуьриз кIанзавай агьалияр «Зи Документар» центрайри гьар юкъуз вишералди кьабулзава. И месэлайрай талукь тир меслятарни пулсуздаказ къачудай мумкинвал ава.
1-классдиз физвай аялриз
Гзаф аялар авай, эменни тIимил тир хизанриз гьукуматди ийизвай куьмекрикай сад 1-классдиз физвай аялдиз са сеферда 2 агъзур манат пул гун я.
И такьатар къачун патал агъадихъ къейднавай документарни гваз жуваз къулай тир МФЦ-диз фин герек я:
— дидединни бубадин паспортар;
— аял хайивилин шагьадатнама;
— эвленмиш хьанвайвилин ва я бубавал тестикьарнавай шагьадатнама;
— эгер диде-бубади кIвалахзаватIа, зегьметдин дафтардин копия ва эхиримжи пуд вацран мажиб къалурнавай справка;
— аял 1-классдиз тайинарнава лагьай справка;
— хизанда авай ксарин гьакъиндай справка;
— банкунин реквизитар.
Пособие къачуниз талукь документар алай йисан 1-июлдилай 1-декабрдалди кьабулзава.
Гзаф аялар авай хизан я лагьай дережа
Гзаф аялар авай хизан тирди тестикьарзавай дережади (статус) государстводи ва региондин гьукумдарри тайинарнавай бязи кьезилвилерикай (ЖКУ-дин гьакъийриз талукь яз), яшайишдин рекьяй куьмек гуниз талукь серенжемрикай (чилин участок къачун патал нубатда акъвазуниз талукь яз) менфят къачудай мумкинвал гузва.
Ам хизанда пуд лагьай аял хьайила, эгер муькуь кьве аялдин яшар 18 йисав агакьнавачтIа, къачуз жеда. И справка, виликамаз МФЦ-диз хабар гана, агъадихъ къалурнавай документар гваз фена, гьанай къачуз жеда:
— хизанда авайбурун паспортар;
— аялрин хайивилин шагьадатнамаяр;
— эвленмиш хьанвайвилин шагьадатнама;
— хизанда авай вирибурун СНИЛС-ар.
Къейдзавайвал, диде-бубадикай садахъ справка къачун патал вич физвай МФЦ авай чкадин (райондин, шегьердин) прописка хьун герек я.
«Лезги газет»
