Яргъал вегьез кIанзава

Украинадин гьалари къалурзава хьи, США-дин терефди къалмакъал яргъалди давамарунин алахъунар ийизва. Ихьтин фикир­ РФ-дин Президент Владимир Путина лагьана, хабар гузва “Новости” РИА-ди.

Президентди къейд авурвал, Россияди вичин милли итижар таъминарда ва амадагвалзавай уьлквейрин пад кьада.

Украинадин МИД-дин кьил Д.Кулебади идалай вилик къейд авурвал, РагъакIидай патан бязи уьлквейри Украинади рей гун гуьзетзава, гьа чIавуз вири месэлаяр гьялай мисал жеда. Адан фикирдалди, РагъакIидай патан бязи уьлквейрин вилик-кьилик квайбуру гузвай суалри къалурзава хьи, абуруз гьакъикъатдани Украина магълуб хьана кIанзава.

16-августдиз РФ-дин оборонадин министерстводи малумарай делилралди, махсус серенжем кьиле тухунив эгечIайдалай инихъ Россиядин Яракьлу Къуватри Украинадин 267 самолет ва 148 вертолет, зенитный ракетайрин 365 комплекс, пилот галачиз лув гудай 1743 аппарат, 4328 танк ва дяведин маса машинар, РСЗО-дин 799 машин, артиллериядин ва маса 3307 яракь, военный махсус 4902  автомашин тергна.

Рекьерал аварияр

“Новости” РИА-ди 2022-йисан сад лагьай паюна Россиядин регионра арадал атай автомашинрин аварийрикай малуматар раижнава.

Къейдзавайвал, рекьерал гзаф аварияр жезвай вад региондик Тува, Амурдин область, Карачаево-Черкесия, Алтай, Тюмендин область акатзава.

Чечняда, ЯНАО-да, Томскдин областда, НАО-да, Свердловскдин областда зур йисан муддатда виридалайни тIимил аварияр­ хьанва.

Садазни хъсанвал гъидач

Китайдин МИД-дин кьили къейднавайвал, 1,4 миллиард китайвидихъ галаз мидявал авуни садазни хъсанвал гъидач. Адан фикир “ТАСС” чешмеди раижнава.

“Тайвандин месэладин патахъай чпин мажбурнамаяр чIуру­налди, гьакIни виликамаз сад-садал гьалдарунин кьуьруькар акъу­дуналди США-ди анжах чпин дережа агъузарда”, — лагьана китайви министрди.

Къейд ийин, Тайвандин проливда ва Азиатско-Тихоокеанский регионда 2-3-агустдиз США-дин Конгрессдин векилрин Пала­тадин спикер Н.Пелоси Тайбэйдиз фейидалай кьулухъ гьалар къизгъин хьана.

МРОТ хкажун теклифнава

ЛДПР-дин патай депутатриз Госдумадиз МРОТ-дин кьадар саки кьве сеферда артухар хъувуниз талукь законопроект теклифдай фикир ава. “Новости” РИА-ди хабар гузвайвал, идан гьакъиндай документ Думадин чешмеда чапнава.

“Зегьметдин гьакъидин агъа кIанин кьадар яз 2023-йисан 1-январдилай 30 агъзур манат тайинарин”, — кхьенва малуматда.

Теклиф малумарзавай авторри тестикьарзавайвал, ихьтин камуни халкьдин кесибвилин дережа агъузарда. Депутатрин гьисабунралди, зегьметдин гьакъидин агъа кIанин кьадар кьве сеферда артухарун патал 1,16 триллион манат кIан жеда.

Нетижалуди яз гьисабзава

Коронавирусдиз акси “Спутник V” вакцина Россиядин тарихда маса уьлквейриз виридалайни гзаф ракъурай дарман хьана. Ихьтин фикир Россиядин ачух инвестицийрин фондунин кьил К.Дмитриева малумарна.

Къарпуз гьикьван неда?

Сагъламвилиз хийир хьун патал къарпуз тIуьнихъни кьадар ава. Идакай “Sputnik” радиодиз гайи интервьюда алим, пегьризчи А.Хачировади ихтилатна.

Ада къейд авурвал, гьар юкъуз 2 порциядилай тIимил тушиз емишар, майваяр тIуьни инсандин бедендиз хъсан патахъай таъ­сир­зава. Пешекарди гъавурда турвал, гьар са порция гъутун екевилелай артух хьана кIандач. Гьа и къайдадал къарпузар недайлани амал авун герек яз гьисабзава. Хачировадин фикирдалди, къарпузар кьадардилай артух тIуьна виже къведач, вучиз лагьай­тIа ада бедендик квай минералар “чуьхуьнал” гъун мумкин я.  Алимди алава хъувурвал, къарпуз тIуьнин тайин кьадар авач, амма артух ишлемишун герек авачиз гьисабзава.

М.Мурашкоди малумарна

Россияда коронавирус акатзавайбурун кьадар артух хьанвайвиляй жемиятдин чкайра маскаяр алукIунин къайдадал амал авун чарасуз я. “ТАСС” чешмеди хабар гузвайвал, ихьтин фикир РФ-дин здравоохраненидин министр М.Мурашкоди малумарна.

«Лезги газет»