Сколопендра
Шикилдай аквазвай гьашарат дуьньядин жуьреба-жуьре чими чкайра яшамиш жезвай сколопендра я. Абурун жинсиник 90-далай гзаф жуьрейрин сколопендраяр акатзава.
Гзаф кIвачер квай сколопендради гъвечIи гьашаратар ва юкьван тар авачир гьайванар незва. Бязи дуьшуьшра еке сколопендрайри гъвечIи хурлинкIрал, хушраканрал, гъуьлягърал, хъиперал, гьатта кьаркьулуврал гъуьрч ийизва.
Алимри тестикьарнавайвал, сколопендрайрин бязи жуьреяр зегьер квайбур я. И пепеяр инсанар яшамиш жезвай кIвалерани гьалтзава. Сколопендрадин акунар инсандин зегьле тухудай жуьрединбур я. Писателри и гьашарат чпин эсерра пис, зиянкар затI яз къалурзава. Месела, “Кинг-Конг” фильмдай аквазвайвал, зурбадаказ туькIуьрна къалурнавай сколопендрайри сиягьатчийрал гьужумзава.
Вичин жуьредилай ва яшарилай аслу яз, агъу квай бязи сколопендрайри кIасай дуьшуьшра инсан кьиникьал гъунни мумкин я. Амма Россиядин мулкара лап хаталу сколопендраяр яшамиш жезвач.
И жуьредин маса гьашаратрилай тафаватлу яз, сколопендрайрин уьмуьр яргъи я — абурун бязи жуьреяр 2-3 йисуз яшамиш жезва. ТIебиатда абурун кьилин душманар гъуьлягъар я. Ямайка ва Тринидад островра, Кьиблепатан Америкада яргъивилел 26 сантиметр алай сколопендраяр яшамиш жезва.
«Лезги газет»
