Чи ватанэгьлияр — гьар сана
Урусатдин жуьреба-жуьре пипIера яшамиш жезвай чи ватанэгьлийрик акьалтзавай несилдиз чирвилерни тербия гунин рекье зегьмет чIугвазвайбурни тIимил квач. Марина Шаировна Мардановани Туладин областда агалкьунралди кIвалахзавай муаллим я.
М.Марданова 1991-йисан 14-июндиз Туладин областда дидедиз хьана. Адан буба Шаир Гьажибалаев — Хъачмаз райондай, диде КцIар райондай я. Кьисметди вич хизанни галаз акъудай чкадикай Ш.Гьажибалаева икI ихтилатзава: “Чун 1986-йисуз кьисметди Туладин областдиз акъудна. Инин тIебиатди зун гьейранарзава. Бязи чкаяр чи ватандин тIебиатдиз ухшар я. Чи хизан яшамиш жезвай Никольское-Вяземское хуьр за жуван кьвед лагьай ватан яз гьисабзава”.
Жуьреба-жуьре карханайра зегьмет чIугур Ш.Гьажибалаевахъ грамотаяр, чухсагъулдин чарар ва маса шабагьар гзаф ава. Адахъ кIарасдал нехиш атIудай, гуьрчег затIар туькIуьрдай алакьунарни ава. Л.Толстоян музейдиз ада вичи кIарасдикай нехишар атIуналди туькIуьрнавай кресло пишкешна…
Мектеб куьтягьай 2008-йисуз Марина вичин рикI алай пешедай кIелун патал Черндин пешекарвилин педагогикадин колледждин гъвечIи классрин муаллимрин факультетдик экечIна. Кьуд йисуз чирвилер деринарайдалай кьулухъ Маринади Большое Скуратоводин юкьван мектебда муаллимвилин рекье сифте камар къачуна.
Кьилин образование къачунин месэлани ада кIвалахдивай къерех тахьана кьилиз акъудна: 2012-2016-йисара И.С.Тургеневан тIварцIихъ галай Орелдин гьукуматдин университетда заочнидаказ кIелна.
“Тарс гузвай касди вичиз мадни чирвилер къачунин кар датIана давамарун герек я”, — лагьанай са камалэгьлиди. Муаллимвилин кIвалахдин 11 йисан тежриба авай Марина муаллимдини алай аямдин муаллим девирдихъ галаз кам-камуна аваз физвайди, вахт-вахтунда чирвилерин дережа хкажзавайди, датIана цIийивилерихъ къекъвезвайди хьун чарасуз яз гьисабзава.
“За гьар пуд йисалай пешекарвилин дережа хкажзава. Муаллимди вичин чирвилер гегьеншарунин кар садрани акъвазарна виже къведач. Аялриз тарсар гузвай муаллимдин эвелни-эвел пешедал рикI хьун важиблу я”, — лугьузва муаллимди.
Муалливиле кIвалахзавай йисара ада райондин, областдин дережайрин хейлин конкурсра иштиракна. 2013-йисуз Марина муаллимди “Педагогвилин сифте камар” конкурсда райондин жегьил муаллимрин арада сад лагьай чка кьуни адан алакьунрикай, ада пешедиз ийизвай майилвиликай лугьузва. 2016-йисуз райондин “Йисан муаллим” конкурсда ада тежрибалу гзаф муаллимрин арада ва 2020-йисуз “Сагъламвилин муаллим” конкурсда 3-чкаяр кьуна. Гьар жуьре конкурсра, олимпиадайра агалкьунар къазанмишзавай вичин ученикрал ада гьахълудаказ дамахзава. Тежрибалувилиз, алакьунриз килигна, 2019-йисуз адаз кьилин категория гана.
Марина Марданова спортдани викIегьвал къалурзавай муаллимрикай я. «Спортдал зи гзаф рикI ала. ГТО-дин нормативар вахкунай захъ гимишдин лишан ава», — лугьузва ада.
Къейд ийиз кIанзава хьи, Маринадин стхадини муаллимвилин пеше хкянава — физкультурадин тарсар гузва. ЧIехи вах Теллиханума Москвада духтур яз кIвалахзава. Къуй чи ватанэгьлийрихъ гьар са карда агалкьунар хьурай!
К.Ферзалиев
