И йикъара Сергей Меликован регьбервилик кваз образованидин объектар эцигунин, капитальный ремонт авунин ва абуруз лицензияр гунин месэлайрай совещание кьиле фена, хабар гузва РД-дин образованидин ва илимдин министерстводи.
Мярекатда министерствойрин, идарайрин, республикадин муниципалитетрин кьилери иштиракна. Сергей Меликова хабар гайивал, алай вахтунда Дагъустанда 1412 мектебни аялрин 812 бахча кардик ква. ЦIи республикадин умуми образованидин 210 мектебда ремонтдин кIвалахриз, санлай къачурла, 3 миллиард манатдилай артух харжияр авун фикирда ава.
“КIелунин цIийи йисуз мектебриз 450 агъзурдалай гзаф аялар фида. 1-сентябрь — Чирвилерин югъ — абур патал халисан сувариз элкъуьн иллаки важиблу я. И мураддалди чна жувалай аслу вири крар авун, сувариз талукь тир шартIар арадал гъун лазим я”, — лагьана С.Меликова.
Идарадин делилралди, 90 объект вахтунда ва я тайинарнавай графикдилай вилик вахкуда. Абурун гьазурлухвилин гьал 79-99 процентдиз барабар я. Совещанидин кIвалахда видеоалакъадин куьмекдалди иштиракай РФ-дин просвещенидин министрдин заместитель Андрей Николаеван гафаралди, образованидин объектар эцигунин рекьяй Дагъустан эхиримжи йисара Россиядин амай регионрилай вилик ква.
Республикадин вице-премьер Муслим Телякавова хабар гайивал, 1606 аялдивай кIелиз жедай 4 мектебдиз ва 2360 аял патал чкаяр авай 15 бахчадиз лицензияр гуда, 1-сентябрдилай абуру аялар кьабулиз башламишда.
РД-дин образованидин ва илимдин министр Ягья Бучаеван гафаралди, республикадин мектебар капитальнидаказ ремонт авунин жигьетдай гьазурвал 75 процентдилай гзаф я.
“17 муниципалитетда и жигьетдай кIвалахар йигин еришралди кьиле физва. Санлай къачурла, капитальный ремонт кьиле тухузвай объектрал пудратчийри кIвалахрик мадни худ кутунва”, — лагьана ада. Я.Бучаева аялри ял ядай лагеррикайни лагьана: республикадин мулкунал 122 лагерь кIвалахдив эгечIнава. Абурун арада 26 — шегьеррин къерехра авайбур, 96 лагерь мектебринбур я. Икьван чIавалди легерра 23,7 агъзур аялди ял яна.
«Лезги газет»
