РД-дин карчивилин ва инвестицийрин рекьяй Агентстводин регьбер Артем Хрюкин ва РД-дин экспортдиз куьмек гунин Центрадин директор Руслан Абаскъулиев и йикъара Дербент райондин Белиж поселокда авай мижеяр гьазурунал машгъул “Ширван” ООО-диз мугьман хьана. Идакай РД-дин экспортдиз куьмек гунин Центради хабар гузва.
КIвалахдин рекьяй мугьманвилин сергьятра аваз абур заводдин гендиректор Алмаз Абдулгъаниевахъ галаз таниш хьана, мижеяр гьазурунин ва абур къапара цунин технологияр ахтармишна, производство гележегда гегьеншарунин планриз килигна. Заводдин директорди мугьманриз заводдикай, кьилди къачуртIа, ам Вирироссиядин ва международный выставкайра са шумуд сеферда майдандиз экъечIайдакай хабар гана.
Кархана гегьеншаруникай лугьудайла Абдулгъаниева малумарайвал, ихьтин планар карханадихъ авазва, амма алай вахтунда экономикадин хиле кардик квай кьетIен гьалара лазим тир тадаракар маса къачунихъ галаз алакъалу са жерге четинвилер арадал атанва.
Артем Хрюкина къейд авурвал, государстводи алай вахтунда кьезил шартIаралди кредитар ва карчивилин субъектриз куьмек гунин, гьа жергедай яз карханайрин мумкинвилер гегьеншарунин къайдаяр жагъурнава.
Жасмина Саидова
