И йикъара РД-дин Гьукуматдин Председателдин заместитель Мурад Къазиев медицинадин идарайрин ва агьалийриз яшайишдин рекьяй къуллугъдай центрадин кIвалахдихъ галаз таниш хьун патал Лак райондиз мугьман хьанвай. “Лезги газетдиз” РД-дин Гьукуматдин пресс-къуллугъди хабар гайивал, РД-дин здравоохраненидин министрдин заместитель Салман Агьмедовахъ, муниципалитетдин кьил Юсуп Мегьамедовахъ ва Лак райондин азарханадин кьилин духтур Абдурагьим Дибировахъ галаз санал вице-премьер сифте нубатда Хури ва Шара хуьрера эцигнавай модулдин ФАП-риз килигна.
Къейд ийин хьи, ФАП-ар государстводин программадин сергьятра аваз РД-дин здравоохраненидин министерстводи эцигнава. Алай вахтунда дараматрин къенепатан кIвалахар акьалтIарзава, экв, яд гъизва. М.Къазиева медицинадин цIийи идарайрин патав гвай мулкар авадан авуниз эвер гана ва Хури хуьревай ФАП-дин куьгьне дараматда амбулатория кардик кутуртIа жедайди къейдна.
Гуьгъуьнлай М.Къазиев Лак райондин кьилин духтурханадиз мугьман хьана, чкадин коллективдихъ ва сагъламвал мягькемар хъийизвай агьалийрихъ галаз рахана. Азарлуйри стационарда чпив медицинадин рекьяй хъсан еридин куьмек агакьзавайдакай лагьана. Духтурханада кIвалах тешкилнавай гьалдиз килигзавай чIавуз М.Къазиев ина саки 63 йисуз фтизиатр яз кIвалахзавай Мегьамед Айгуновахъ галаз таниш хьана. 89 йисан яшда авай и духтур къени чкадин агьалийрин къуллугъда акъвазнава ва адахъ коллективда еке гьуьрмет ава. Республикадин вице-премьерди РД-дин здравоохраненидин министерстводал М.Айгунован зегьмет республикадин дережада авай шабагь гуналди къейд авун тапшурмишна.
Гуьгъуьнлай М.Къазиев Къумухрин хуьре цIийи духтурхана эцигзавай чкадал фена, кIвалахриз къимет гана.
Агьалийрин яшайишдин рекьяй къуллугъдай центрадин коллективдихъ галаз кьиле фейи гуьруьшдал республикадин вице-премьерди къейд авурвал, яшайишдин рекьяй къуллугъ авунин месэла РД-дин Кьилин кьетIен гуьзчивилик ква. И кардихъ галаз алакъалу яз, ада чкадин пешекарривай агьалийрал агакьарзавай къуллугърин ери хъсанаруниз кьетIен фикир гун истемишна.
«Лезги газет»
