5-августдиз РД-дин Гьукуматдин Председатель Абдулмуслим Абдулмуслимован буйругъдалди, кьиле республикадин сад лагьай вице-премьер Манвел Мажонц авай делегация Къизилюрт шегьердиз мугьман хьана. Идакай “Лезги газетди” РД-дин Гьукуматдин пресс-къуллугъди хабар гана.

М.Мажонц цин объектар авай гьалдихъ, яшайишдин объектар эцигунин ва мектебар цIийикIа туькIуьр хъувунин кIвалахрихъ галаз таниш хьана.

РикIел хкин, мукьвара Къизилюртда цIийиз эцигзавай шегьердин кьилин духтурханадин аялар хадай отделенидин дараматди цIай кьунай. Чкадин гьукумдин векилри, дараматдиз са акьван еке хасаратвилер тахьанвайвиляй, цIу канвай чкаяр туькIуьр хъувуна, эцигунар­ давамар хъийидай къарар кьа­булнай. Манвел Мажонца и объектдал кIвалахар кьиле физвай гьални ахтармишна.

Къейд ийин хьи, аялар хадай отделенида 120 чка жеда. 2008-йисалай инихъ эцигзавай объект чкадин агьалийри рикIик къалабулух кваз вилив хуьзва. Пудратчи карханадин векилдин гафаралди, цIай кьунин нетижада хьанвай хасаратвилер пудратчи фирмадин такьатрихъ арадай акъудзава. Исятда цIай кьур къав дегиш хъувунва, къецепатан цларин зарар хьанвай чкаярни цIийи хъийиз­ва, къенепатан кIвалахарни худда ава.

Манвел Мажонца и юкъуз Къизил­юртдин администрацияда совещанини кьиле тухвана. Мярекатдин иштиракчийри шегьерда эцигунар кьиле физвай майданрал алай гьалар веревирдна. РД-дин сад лагьай вице-премьерди къейд авурвал, ина мукьвал тир йисара чкадин агьа­лияр бес кьадарда хъвадай хъсан еридин целди таъминарун патал цин са шумуд объект эцигда. Абурун арада насосдин станция, яд михьдай махсус имарат ва масабур ава. КIвалахар федеральный “Чистая во­да” проектдинни республикадин инвестицийрин программадин куьмекдалди кьилиз акъудда.

Агьмед Магьмудов