КIелунин цIийи йис мукьва жезва. Гзафбуру 2022-йисуз аялар мектебдиз рекье тун патал гьазурвилер акунин карда государстводи куьмек гудай серенжемар кьабулдани лугьуз хабарар кьазва.
“Лезги газетдиз” РД-дин Пенсийрин фондунин пресс-къуллугъди хабар гайивал, гьелелиг и месэладиз талукь са документни авач. Амма и карда дегишвилер хьун мумкин я, вири уьлкведин руководстводи кьабулдай къарардилай аслу я. РикIел хкин, шаз РФ-дин Президент Владимир Путинан тапшуругъдалди мектебдиз фидай яшара авай аялар чIехи жезвай хизанрив са сеферда гузвай пулдин такьатар агакьнай. 1-сентябрдиз мукьва яз ихьтин вири хизанриз, яшайишдин рекьяй абур авай гьалар фикирда такьуна, 10 агъзур манатдин кьадарда аваз пособияр чара авунай.
Алай вахтунда лагьайтIа, пособидик анжах текдиз (я дидеди, я бубади) 8-17 йисарин яшара авай аялриз тербия гузвай диде-бубайривай умуд кутаз жеда. Ихьтин хизанар патал махсус пособие гудай къарар алатай йисан июлдин вацра кьабулнай.
Чи мухбир
