И йикъара Докъузпара райондин Къалажухрин хуьруьн куьчейрикай сад “Дагъустан АССР-дин лайихлу мелиоратор” тIварцIин сагьиб хьайи Сабир Асанагъаевич Мусаеван тIварцIихъ ягъунин ва цлал мемориалдин кьул алкIурунин мярекат кьиле фена. Ана хуьруьн администрациядин кьили, агъсакъалри, С.Мусаеван рухвайрини рушари, миресри, мукьва-кьилийри ва масабуру иштиракна.
Сабир Мусаев 1938-йисан 28-декабрдиз Къалажухрин хуьре дидедиз хьана. Ада ирид йисуз хайи хуьруьн, гуьгъуьнлай Миграгърин мектебра лап хъсан къиметралди кIелна. Армияда къуллугъ кьилиз акъудайдалай кьулухъ ада Батайск шегьерда киномеханиквилин курсар куьтягьна. И пешедай ада вичин вахтунда еке гьевесдивди Къуруш, Миграгъ, Миграгъ-Къазмаяр, Къалажух, Теки хуьрера кIвалахна. Са кьадар вахтарилай ам Ленинграддин хуьруьн майишатдин институтдин экономикадин факультетдик экечIна ва, дерин чирвилер къачуналди, 1967-йисуз анаг акьалтIарна.
КIвалахунихъ галаз сад хьиз, ада 1977-йисуз заочнидаказ Махачкъаладин гидромелиорациядин техникум, гуьгъуьнлай Москвада СССР-дин хуьруьн майишатдин министерстводик акатзавай хуьруьн майишат идара ийидай кьилин школа куьтягьна.
ЦIийи пеше къачурдалай кьулухъ сифтедай гьукуматдин “Корводстрой” идарада кIвалахна, 1978-йисуз “Дагестансельхозводстрой” объединенидин “Дагрисводстрой” трестдин директордин заместителвиле тайинарна. 1985-йисуз адаз “Дагъустан АССР-дин лайихлу мелиоратор” лагьай гьуьрметдин тIвар гана. Гьакъикъатдани, а девирда С.Мусаев лайихлу мелиоратор ва гидротехник яз машгьур хьана. “Дагрисводстройдин” финансринни экономикадин месэлаяр Москвада С.Мусаева гьялзавай.
Уьлкведин, республикадин дережайра адан зегьмет гьуьрметдин хейлин грамотаяр, пишкешар, “Гьуьрметдин лишан” орден, “Зегьметдин ветеран” медаль гуналди къейдна. Сабир Мусаеван хизанда 5 веледдиз — кьве хцизни пуд рушаз — тербия гана.
ЧIехи несилдин векилри Сабир Мусаев ашкъидивди рикIел хкизва. 2001-йисуз хуьре хъсан булах туькIуьрна, адан тIварцIихъ ягъунини ватанэгьлийрин патай адаз гьуьрмет хьайивилин гьакъиндай шагьидвалзава.
— Хуьре булах туькIуьрун суваб авай кIвалахрикай я. Куьче Сабир Мусаеван тIварцIихъ ягъунин теклиф гайи ва и кар кьилизни акъудай Тажир Мурадовни сагърай. Им чун патал лишанлу ва кутугай кар хьана, — лагьана хуьруьн администрациядин кьил Замидин Мирзоева.
Сабир Мусаева республикадин мелиорациядин хиле кIвалахай вахтунда хуьруьнвияр патал булах гъун патал вичин патай турбаяр чара авурдакай, и кардикай дуланажагъ патал еке куьмек хьайидакай галай-галайвал агъсакъал Мелик Балакъадашева ихтилатна.
Мярекатдал Тайинали Айсаев, Тажир Мурадов, Нурагьмед Нурагьмедов, Ирван Мусаев ва масабур рахана. Абуру рагьметлудан хъсан къилихар, крар рикIел хкана ва багърийриз чухсагъул малумарна.
С.Мусаеван чIехи хва Ибрамхалил Мусаева вичин “Сихилдин къул” ктабда кхьенвайвал, Докъузпара районда исятдани кардик квай “Миграгъ-Къазмаяр-Усугъчай” ва “Къуруш-Мискискар” дигидай цин къаналар туькIуьрунин кардани адан бубади иштиракна. И ва маса бязи делилар талукь чешмейра къалурнавачтIани, къалажухвийрин рикIелай адан зегьметар, алахъунар алатнавач. Ибрамхалил Мусаева мярекатдал бубадиз бахшнавай вичин “Сабиран булах” шиирни кIелна.
1991-йисуз, 52 йис тамам хьанваз, Сабир Мусаев денбеден рагьметдиз фена. Хуьруьн кьилин куьчейрикай сад адан тIварцIихъ ягъуни хъсан инсандин тIвар эбеди ийизва, несилриз регьимлувилин чешне къалурзава.
Куругъли Ферзалиев
